MSK: Seçki məntəqələrinin 65 faizindən alınmış məlumatlara əsasən İlham Əliyev 86,09 faiz səs toplayıb

Mərkəzi Seçki Komissiyasının sədri Məzahir Pənahov prezident seçkilərində məntəqələrin 65 faizindən alınmış məlumatların nəticələrini açıqlayıb.
AZƏRTAC xəbər verir ki, mətbuat konfransında bu barədə məlumat verən Məzahir Pənahov deyib: “Bu gün Azərbaycanda 125 seçki dairəsinin hamısında seçkilər baş tutub. İndiyədək Mərkəzi Seçki Komissiyasına 5641 məntəqənin 3675-dən, yəni, 65 faizdən çoxundan məlumatlar daxil olub. Etibarlı sayılmış 2 milyon 660 min 622 səsin hesablanmasından sonra Əliyev İlham Heydər oğlu 2 milyon 290 min 486 səs (etibarlı səslərin 86,09 faizi) toplayıb və böyük fərqlə liderlik edir.
Yerdə qalan səslər digər namizədlər arasında belə bölünüb:
Əlizadə Araz Məmməd-Mübariz oğlu - 37 min 145 səs (1,40 faiz);
Hacıyev Hafiz Ələmdar oğlu - 40 min 171 səs (1,51 faiz);
Həsənquliyev Qüdrət Müzəffər oğlu - 80 min 844 səs (3,04 faiz);
Quliyev Fərəc İbrahim oğlu - 31 min 317 səs (1,18 faiz);
Məmmədov Sərdar Cəlal oğlu - 79 min 108 səs (2,97 faiz);
Nurullayev Razi Qulaməli oğlu - 19 min 856 səs (0,74 faiz);
Oruc Zahid Məhərrəm oğlu - 81 min 695 səs (3,07 faiz).
MSK-nın sədri bildirib ki, məntəqələrdən məlumatların daxil olması davam edir. “Hesab edirəm ki, yaxın saatlarda seçki məntəqələrinin hamısından məlumatlar alınacaq. Həmin məlumatlar əsasında ilkin nəticələr ictimaiyyətə açıqlanacaq”, - deyə Məzahir Pənahov əlavə edib.