Bakıda DÇ-nin 2-ci gününə start verilib

Bakıda velosiped idmanının BMX növü üzrə dünya çempionatının ikinci gününə start verilib. SİA-nın məlumatına görə, yarışda 43 ölkədən 1500-dək velosipedçi birincilik uğrunda mübarizə aparır. Mundialın ikinci günündə yeniyetmə və həvəskarlar arasında daha bir neçə kateqoriyada qaliblər müəyyənləşəcək.Dünya çempionatında Azərbaycan 8 idmançı ilə təmsil olunur. “Challenge” kateqoriyasında yarışacaq velosipedçilərdən Xəyal İbrahimov, Soltan İsrafilov və Justinas Pavlovas bu gün mübarizəyə qoşulacaqlar. İyunun 7-də Orxan Məmmədov, Vüqar Nəsibov, Kənan Babayev və Yelmar Şahmarzadə çıxış edəcəklər. Elit kateqoriyasında yarışacaq Aqşin İsmayılov isə iyunun 8-də start xəttinə çıxacaq.İndiyə kimi ölkəmiz Olimpiya idman növü olan güləş, boks və bədii gimnastika üzrə dünya çempionatına ev sahibliyi edib. Velosiped idmanının Olimpiya növü olan BMX üzrə dünya çempionatı Azərbaycanda keçiriləcək sayca dördüncü dünya çempionatıdır.Çempionatın keçirildiyi BMX stadionu 2014-cü ildə tikilib və burada ilk Avropa Oyunlarının BMX üzrə velosiped yarışları təşkil olunub. Lakin 2016-cı ildə Beynəlxalq Velosipedçilər İttifaqı (UCI) BMX stadionlarının standartlarını dəyişib. Trekin uzunluğu, eni, döngələrin hündürlüyü artırılıb, maneələrin konfiqurasiyası dəyişdirilib.Qeyd edək ki, çempionatın ilk günündə yeniyetmələr, həvəskarlar və veteranlar arasında 14 yaş kateqoriyası üzrə qaliblər müəyyənləşib.

sia.az