Xəbərlər

  • 4 461

BMT QAK-ın regional nümayəndəsi: “Azərbaycanda qaçqınlar və məcburi köçkünlər üçün hərtərəfli şərait yaradılıb”

image

İyulun 10-da Azərbaycan Respublikası Baş nazirinin müavini Əli Əhmədov ölkəmizdə səfərdə olan BMT-nin Qaçqınlar üzrə Ali Komissarlığının (QAK) regional nümayəndəsi Yohannes van der Klauvun rəhbərlik etdiyi nümayəndə heyəti ilə görüşüb. AZƏRTAC xəbər verir ki, Əli Əhmədov qaçqınların və məcburi köçkünlərin həyat şəraitinin, sosial təminatının yaxşılaşdırılması istiqamətində görülən işlər barədə qonaqlara ətraflı məlumat verib. O, BMT QAK-ın hər zaman Azərbaycan hökumətinin reallaşdırdığı layihələrin dəstəkçisi olduğunu vurğulayıb.
Əli Əhmədov görüşdə iştirak edən “Fuji Optical Co. Ltd” şirkətinin rəhbəri, dünya şöhrətli oftalmoloq Akio Kanaiyə ölkəmizdəki qaçqın və məcburi köçkünlərə, aztəminatlı ailələrə göstərilən təmənnasız optometrik xidmətə görə Azərbaycan hökuməti adından təşəkkürünü bildirib, bunun ən böyük humanistlik və xeyirxahlıq nümunəsi olduğunu diqqətə çatdırıb.
Qeyd edilib ki, Yaponiyanın “Fuji” humanitar missiyası Azərbaycandakı humanitar fəaliyyətinin yerinə yetirilməsi üçün 2005-ci ildən indiyədək 2,6 milyon ABŞ dollarınadək vəsait xərcləyib. 54 minədək yüksəkkeyfiyyətli optik eynək və digər əşyalar BMT QAK xətti ilə Azərbaycana gətirilib. Ümumilikdə, 28 mindən artıq qaçqın, məcburi köçkün və digər həssas qruplardan olan insanlar BMT QAK-ın Azərbaycandakı nümayəndəliyinin aidiyyəti hakimiyyət orqanları ilə birgə şərait yaratdığı ödənişsiz göz müayinəsi xidmətlərindən faydalanıb. “Siz həm də Beyləqan rayonunda sudan əziyyət çəkən bəzi insanlara yardım etmisiniz, buna görə də sizə təşəkkür edirik”, - deyə Baş nazirin müavini bildirib.
BMT QAK-ın regional nümayəndəsi Yohannes van der Klauv Azərbaycanda qaçqın və məcburi köçkünlər üçün yaradılan hərtərəfli şəraitdən məmnun qaldıqlarını qeyd edib. Sonra Akio Kanai Azərbaycanda gördükləri işlər barədə ətraflı məlumat verib. Görüşdə maraq doğuran digər məsələlər ətrafında fikir mübadiləsi aparılıb. BMT-nin qaçqınlar üzrə ali komissarının Azərbaycana yeni təyin olunmuş nümayəndəsi Quido Ambroso da görüşdə iştirak edib.

Digər xəbərlər