ADA Universitetinin müəllim və tələbələri şərəf andı içiblər

Sentyabrın 10-da ADA Universitetinin müəllim və tələbələrinin şərəf andını içmələri mərasimi keçirilib. AZƏRTAC xəbər verir ki, Azərbaycan Respublikasının Dövlət himninin səsləndirilməsi ilə başlanan tədbir ADA Universitetində təhsil alan tələbələrin öz ölkələrinin bayraqlarını səhnəyə gətirmələri ilə davam edib.

Tədbirdə Şərəf Məcəlləsini bu tədris ilində universitetə yeni qəbul edilmiş 540 bakalavr, 130 magistr, 35 müəllim imzalayıb.

Qeyd olunub ki, ADA Universitetində şərəf andının içilməsi hər yeni tədris ilinin əvvəlində keçirilən ənənəvi mərasimdir. Universitetə bu il qəbul olunan tələbələr, işə yeni başlayan müəllim və heyət üzvləri şərəf andını içərək Şərəf Məcəlləsini imzalamaqla bu ali məktəbin akademik əxlaq və dürüstlük prinsiplərinə sadiq qalacaqlarına söz verirlər.

Şərəf Məcəlləsi beş akademik əxlaq və dürüstlük prinsipindən ibarətdir: “Yalan danışma! Aldatma! Plagiatlıq etmə! Ayrı-seçkilik salma! Bu prinsipləri pozmaqda başqalarına yardım etmə!”. ADA Universitetinin fəlsəfəsi akademik əxlaq və dürüstlüyün sanksiya, qadağa və hədələrin tətbiqi ilə deyil, bu dəyərləri yüksək tutan akademik mədəniyyətin aşılanmasına arxalanır. Bir qayda olaraq, tədris ilinin əvvəlində yeni tələbələr akademik əxlaqın dünyada ümumi qəbul edilmiş standartları barədə maariflənmək üçün dekanlar və müəllimlər ilə müzakirə panelləri keçirirlər.

Tədbirdə ADA Universitetinin rektoru Hafiz Paşayev qısa müddətdə əldə edilən nailiyyətlərdən, təhsil ocağındakı sürətli inkişafdan söz açıb, uğurların davamlı olacağını bildirib. Rektor bu tədris ilində 600-dək müəllim və tələbənin universitetə qəbul olunduğunu diqqətə çatdırıb. H.Paşayev builki məzunların 85 faizdən çoxunun ilk üç ayda işlə təmin olunduğunu vurğulayıb. Rektor universitetə qəbul olunan yerli və xarici tələbələri, o cümlədən müəllimləri yeni dərs ili münasibətilə təbrik edib, müvəffəqiyyətlər arzulayıb. Sonra ADA Universitetinin himni səsləndirilib. Tədbir konsert proqramı ilə davam edib.