"Türkiyənin Naxçıvanda hərbi iştirakı faydalı olar” ÖZƏL-MÜNASİBƏT

Azərbaycan və Türkiyə arasında keçirilən birgə hərbi təlimlər Ermənistanda ciddi narahatlığla qarşılanmaqdadır. Hətta bəzi erməni siyasətçiləri Türkiyənin təlim adı altında Naxçıvanda ordu yerləşdirməkdə olduğunu vurğulayır. Maraqlıdır, Erməniləri məhz narahat etmək, onları psixoloji baxımdan daim gərgin vəziyyətdə saxlamaq üçün Azərbaycanda simvolik də olsa türk bazasının, 5-10 nəfərlik də olsa türk hərbçisinin saxlanılması məqsədəuyğun olarmı?Məsələ ilə bağlı SİA-ya açıqlama verən politoloq Qabil Hüseynli buna çox böyük ehtiyac olduğunu vurğulayıb: “Əslində buna çoxdan ehtiyac var. 1923-cü ilin mayında bağlanan Qars müqaviləsinə görə, Türkiyə Cümhuriyyəti Naxçıvanın təhlükəsizliyi üçün qarant rolunu oynayır. Bu baxımdan Naxçıvanın təhlükəsizliyi baxımından Türkiyə Cümhuriyyəti kifayət qədər məsuliyyət daşıyır. Bu müqaviləyə görə Naxçıvan üçün hər hansı bir təhlükə yarananda, Türkiyə bu təhlükənin dəf edilməsi üçün dərhal iştirak etməlidir. Ermənistanda Naxçıvanla bağlı bəzi sərsəm şüarlar səsləndirilir. Guya bu torpaqlar da ermənilərin olub. Türkiyə və Azərbaycan arasında münasibətlər sıxlaşdırılmalıdır. “Bir millət iki dövlət şüarı” elə belə səsləndirilməyib. Bunu reallaşdırmalıyıq. Bunu real olaraq həyata keçirməliyik. Bu gün Naxçıvan ərazisində Türkiyənin daimi qoşunlarının saxlanılmasına böyük ehtiyac var. Türkiyənin Naxçıvanda hərbi iştirakı faydalı olar”.

sia.az