Siyavuş Novruzov: Hər kəs qanunsuz aksiyalar keçirməklə qarşıdurma yaratmaq istəyənlərin hərəkətlərinə münasibət bildirməlidir

“Oktyabrın 19-da Bakıda keçirilən qeyri-qanunu aksiyaya öz münasibətimizi bildirməliyik. Bir qrup Azərbaycanı istəməyən, erməni lobbisi tərəfindən ictimai sabitliyi pozmaq, xalq-iqtidar birliyinə xələl gətirmək, Azərbaycanda həyata keçirilən islahatların üstünə kölgə salmaq üçün müəyyən olunmuş yerdə deyil, tamamilə başqa yerdə polislə xalq arasında toqquşma, qarşıdurma yaratmağa cəhd göstərdilər”. Bu fikirləri parlamentin bu gün keçirilən plenar iclasında Milli Məclisin İctimai birliklər və dini qurumlar komitəsinin sədri, YAP İcra katibinin müavini Siyavuş Novruzov deyib.
S.Novruzov bildirib ki, radikal müxalifət oktyabrın 19-da atılan addımlarla “Sərbəst toplaşmaq haqqında” qanunu və Azərbaycan Konstutusiyasının maddələrini pozub: “Hüquq mühafizə orqanları tərəfindən məsələ araşdırılmalı, hər kəs buna öz münasibətini bildirməlidir”. Onun sözlərinə görə, indi 1990-cı illər deyil: “Azərbaycan Prezidenti İlham Əliyev qətiyyətli siyasət həyata keçirərək ölkənin maraqlarını beynəlxalq təşkilatlarda, ayrı-ayrı dövlətlərdə, beynəlxalq tribunalarda yüksək səviyyədə təmsil edir. Bu, Azərbaycanı sevməyən qüvvələri narahat edir”.
YAP İcra katibinin müavini söyləyib ki, ölkə əleyhinə həyata keçirilən fəaliyyətlərdə qibləsini tanımayan Azərbaycan müşriklərindən alət kimi istifadə edilir: “Bunu ağaları qarşısında da etiraf edirlər. Mən üzümü dindarlara tutub soruşuram sizin fəaliyyətiniz nədən ibarətdir? Azərbaycan dövlətində məscidlər tikilir, mədrəsələr təmir olunuraq xalqın istifadəsinə verilir. Lakin onlar nə edir, əksinə dağıdırlar. Bu baxımdan düşünürəm ki, hər kəs buna qəti şəkildə mövqeyini bildirməli, ayrı-ayrı tanınan insanlar ortaya çıxıb münasibət bildirməlidirlər”.

yap.org.az