“Gəncədə infrastruktur və yaşıllıqların yenidən qurulması davam edir” - MÜNASİBƏT BİLDİRİLDİ

“Gəncə şəhərində 500 ağacın çıxarılması ilə bağlı məlumat ictimaiyyətin diqqətini cəlb etmişdir. Araşdırmalar göstərir ki, bu tədbir şəhərin infrastrukturunun yaxşılaşdırılması və abadlıq işlərinin həyata keçirilməsi çərçivəsində aparılır. Hazırda şəhərin küçə və parklarında mövcud yaşıllıqların yenidən qurulması və ekologiyanın yaxşılaşdırılması məqsədilə müxtəlif tədbirlər görülür”. Bu sözləri SİA-ya açıqlamasında "Davamlı Turizmin İnkişafına Dəstək" İB-nin sədri Nərminə Qəribova deyib.Nərminə Qəribova sözlərinə belə davam edib: “Qeyd edilən işlər qanunvericiliyə tam uyğun olaraq və dövlət tərəfindən həyata keçirilir. Gəncə şəhəri Azərbaycanın həm ictimai, həm də turizm siyasətində əhəmiyyətli rol oynayır və gələcəkdə burada beynəlxalq tədbirlərin keçirilməsi nəzərdə tutulur.Nəticə olaraq, infrastruktur və abadlıq işləri tamamlandıqdan sonra Gəncə şəhəri daha yaşıl, estetik və sağlam bir mühitə sahib olacaq, şəhər sakinləri və ziyarətçilər üçün daha əlverişli ekoloji şərait təmin ediləcək”.

Ayşən Vəli