Çin aviaşirkəti dünyanın ən uzaqməsafəli birbaşa uçuşlarına başlayıb

Çinin 3 əsas aviasiya şirkətindən olan “China Eastern Airlines” Şanxay ilə Buenos-Ayres arasında dünyanın ən uzaqməsafəli birbaşa müntəzəm uçuşlarına başlayıb.SİA yerli mənbələrə istinadən xəbər verir ki, ilk uçuş dekabrın 4-də reallaşıb. Şanxayın “Pudon” beynəlxalq hava limanından qalxan təyyarə 20 min kilometr məsafəni qət edərək təxminən 25 saatlıq uçuşdan sonra Argentina paytaxtına çatıb.Yeni marşruta Yeni Zelandiyanın Oklend şəhərində ikisaatlıq dayanacaq da daxildir. Burada sərnişinlər təyyarədən düşə və dincələ bilərlər. Dayanacağa baxmayaraq, reys birbaşa hesab olunur, çünki bütün səfər boyu eyni təyyarə və eyni reys nömrəsi istifadə olunur. Lakin o, ən uzun fasiləsiz reys sayılmır. Beynəlxalq aviasiya standartlarına əsasən, əgər sərnişinlər təyyarəni və reys nömrəsini dəyişmirsə, dayanacaqlar birbaşa aviareys anlayışına daxil edilir. Fasiləsiz reys isə əksinə, heç bir dayanacaq etmir və qalxandan enənə qədər eyni təyyarə uçuşu həyata keçirir.Avropa və Şimali Amerikada eniş, bir neçə dəfə təyyarə dəyişməsini tələb edən ənənəvi 30 saatlıq şimal marşrutundan fərqli olaraq, bu yeni cənub marşrutu ümumi səyahət vaxtını azaldır. Uçuşun Oklend-Buenos-Ayres hissəsi Argentina ilə Asiya-Sakit okean regionu arasında yeganə birbaşa hava əlaqəsini təmin etməklə yanaşı, həm də cənub yarımkürəsində azsaylı qitələrarası uçuşlardan biri olub.“China Eastern Airlines” reysi geniş füzelyajı olan “Boeing 777-300ER” təyyarəsi ilə uçuşları həftədə iki dəfə icra edəcək. Dekabr reysləri üçün birtərəfli ekonom sinif biletlərinin qiyməti 1538–2270 ABŞ dolları arasında dəyişir. Biznes sinifdə biletlərin qiyməti isə 5000 dollardan başlayır.Qeyd edək ki, hazırda dünyanın ən uzun fasiləsiz reysi “Singapore Airlines” aviaşirkəti tərəfindən icra olunur. Bu reys Sinqapurda “Çangi” hava limanı ilə Nyu-Yorkdakı JFK aeroportunu birləşdirir. Uçuş 15 349 kilometr məsafəni qət edir və 18 saatdan çox çəkir.