Minimum əmək haqqının artırılması qiymət siyasətinə necə təsir edir ? - EKSPERT

“Minimum əmək haqqının artırılması iqtisadi siyasətin əhəmiyyətli alətlərindən biridir və işçilərin gəlirlərinin yüksəlməsinə xidmət edir”. Bu sözləri SİA-ya açıqlamasında Liberal İqtisadçılar Mərkəzinin sədri Akif Nəsirli bildirib.Onun sözlərinə görə, bu addım eyni zamanda işəgötürənlərin xərclərinə birbaşa təsir göstərir: “Belə ki, əmək haqqının artması şirkətlərin əməliyyat xərclərini yüksəldir və bəzi hallarda müəssisələr bu əlavə xərci kompensasiya etmək məqsədilə malların və xidmətlərin qiymətlərini artırmağa meylli olurlar. Nəticədə, bazarda qiymət səviyyəsi müəyyən dərəcədə yüksələ bilər.Digər tərəfdən, minimum əmək haqqı alan şəxslərin gəlirlərinin artması onların istehlak imkanlarını genişləndirir. Artan alıcılıq qabiliyyəti müəyyən şərtlərdə müəssisələrin qiymətləri kəskin artırmasının qarşısını ala bilər, çünki yüksək tələbat satışları artıraraq əlavə gəlir təmin edir.Bununla yanaşı, bazarda kəskin rəqabət şəraitinin mövcudluğu və inhisarçı qurumların olmaması əlavə tənzimləyici mexanizm kimi çıxış edir. Rəqabətçi mühitdə sahibkarlar bazarı itirmək qorxusundan qiymətləri qaldırmaqdan çəkinir və bu da minimum əmək haqqının qiymət səviyyəsinə təsirini zəiflədir.Minimum əmək haqqının artırılması müəyyən məhsul və xidmətlərin qiymətlərinin yüksəlməsinə səbəb ola bilər, lakin bu təsirin gücü sektordan, bazar şəraitindən və rəqabət səviyyəsindən asılıdır. Bu baxımdan, əmək haqqı siyasəti ilə qiymət sabitliyi arasında qarşılıqlı təsirləri nəzərə almaq, həm işçilərin rifahını, həm də iqtisadi sabitliyi qorumaq baxımından əhəmiyyətlidir”.

Günay Hacıyeva