Rusiyada traktor və kombaynlar tükənir…

...Ekspertlərin hesablamalarına görə, Rusiya kənd təsərrüfatı texnikası bazarı hazırda təxminən 62.000 traktor və 34.000 kombayn çatışmazlığı ilə üzləşir ki, bu da qida istehsalına mənfi təsir göstərə bilər.

SİA xəbər verir ki, bu barədə Ukrayna Xarici Kəşfiyyat Xidməti bildirib.

Kəşfiyyat Xidmətinin məlumatına görə, Rusiyada kənd təsərrüfatı texnikasının satışı 25 faiz azalıb.

Taxıl və yem biçən kombaynların, traktorların, kotanların və kultivatorların satışı xüsusilə əhəmiyyətli aşağı düşüb. Bununla yanaşı, Rusiyada kənd təsərrüfatı texnikasının istehsalı da azalıb.

Məsələn, 2025-ci ilin yanvar-fevral aylarında Rusiya şirkətləri 11faiz az kənd təsərrüfatı texnikası istehsal ediblər.

Rusiya kənd təsərrüfatı texnikası bazarında artıq təxminən 62.000 traktor və 34.000 kombayn çatışmazlığı var.

Nəticədə maşın-traktor parkının amortizasiya dərəcəsi 50 faizi keçib. Bu arada, kənd təsərrüfatı texnikasının dəyişdirilməsi dərəcəsi 10 faiz standartına qarşı cəmi 3,5 faiz təşkil edir. Kəşfiyyat Xidməti hesab edir ki, Rusiya kənd təsərrüfatı texnikası bazarındakı böhran artıq sistemli xarakter alıb və məhsuldarlığa və qida istehsalına mənfi təsir göstərə bilər.

Bu, ABŞ, Avropa və digər ölkələrin 2022-ci ildə Ukraynaya hərbi müdaxiləsinə görə Rusiyaya qarşı tətbiq etdiyi Qərb iqtisadi sanksiyalarının təsiri ilə əlaqədardır.

Yüksək faiz dərəcəsi Rusiyanın kənd təsərrüfatı sektorunda da ciddi problemlərə səbəb olub.

Buna görə də Rusiyanın kənd təsərrüfatı gəlirləri hər il 5-8 milyard dollar azalır. Məsələn, Rusiyada bitkiçilik məhsullarının gəlirliliyi 2020-ci ildə 40 faiz olduğu halda, 2025-ci ildə bu rəqəm cəmi 15 faiz olacaq.

Rusiyada taxıl istehsalı hazırda gəlirsizdir. Kəşfiyyat Xidmətinin proqnozuna görə, kənd təsərrüfatındakı ciddi problemlər səbəbindən Rusiyada ərzaq çatışmazlığı və ərzaq qiymətlərinin artması müşahidə oluna bilər.

Əli Babayev