Elektrikli avtomobillər ümidləri doğrultmur

Dünya üzrə elektrik avtomobillərinin satışları fevral ayında 11 faiz azalaraq 1,1 milyona düşüb və bu da ardıcıl ikinci ayın azalma tendensiyasını davam etdirib. Londonda yerləşən məlumat-analitika şirkəti “Benchmark Mineral Intelligence” fevral ayı elektrik avtomobillərinin satış məlumatlarını açıqlayıb. Məlumatlara görə, ötən ay dünyada 1,1 milyon elektrik avtomobili satılıb. Fevral ayında satışlar həm aylıq, həm də illik müqayisədə 11 faiz azalıb. Elektrik avtomobillərinin satışlarında azalma tendensiyası yanvar ayından sonra fevral ayında da davam edib.

Bu ilin yanvar-fevral aylarında dünya üzrə elektrik avtomobillərinin satışları da ötən ilin eyni dövrü ilə müqayisədə 8 faiz azalaraq 2,2 milyona çatıb. Çində satışlar ötən ilin eyni dövrü ilə müqayisədə ilk iki ayda 26 faiz azalaraq 1,1 milyona çatıb. Çində fevral ayında satışlar ötən ilin eyni ayı ilə müqayisədə 32 faiz azalıb.

Çinin elektrik avtomobilləri bazarında 2014-cü ildən bəri ilk dəfə tətbiq edilən alış vergisi və ticarət proqramı qaydalarının təsiri hiss olunub. Şimali Amerikada da yanvar-fevral aylarında elektrikli nəqliyyat vasitələrinin satışları illik müqayisədə 36% azalaraq 170.000-ə düşüb. Bölgədə satışların azalmasına ABŞ rəhbərlik edib.

Lakin Avropada elektrikli nəqliyyat vasitələrinin satışları ilin ilk iki ayında 21% artaraq 600.000-ə çatıb. Regionun ən böyük bazarları olan Almaniya və Fransa satış artımına liderlik edib, İtaliya isə eyni dövrdə rekord 98% artım qeydə alıb. Qlobal miqyasda elektrikli nəqliyyat vasitələrinin satışları da yanvar-fevral aylarında 84% artaraq 370.000-ə çatıb.

“Benchmark Mineral Intelligence” şirkətinin törəmə şirkəti olan “Rho Motion”un məlumat meneceri Çarlz Lester məsələ ilə bağlı şərh verərək bildirib ki, qlobal elektrikli nəqliyyat vasitələri bazarındakı fikir ayrılığı ildən ilə daha da özünü göstərir. O deyib: "Fevral ayı regional göstəricilərdəki fərqləri kəskin şəkildə vurğuladı. Avropa bazarı ümid vəd etsə də, Şimali Amerikada elektrikli avtomobil bazarında hələ də yavaş inkişaf gedir."

Lalə Mehralı