Pakistanın Baş naziri Məhəmməd Şahbaz Şərif ölkəmizdə rəsmi səfərdə oldu. İki ölkənin münasibətləri möhkəm təməl üzərində qurulub. Qarşılıqlı səfərlər münasibətlərimizin dostluq və qardaşlıq prinsipləri əsasında uğurla inkişafını nümayiş etdirir. Prezident İlham Əliyevin ötən il Pakistana dövlət səfəri iki ölkə arasındakı strateji tərəfdaşlıq münasibətlərinin daha da gücləndirilməsi və bütün sahələr üzrə əməkdaşlığın hərtərəfli genişləndirilməsi baxımından tarixi önəm kəsb etdi. Səfər zamanı Prezident İlham Əliyev Pakistanın Baş naziri Məhəmməd Şahbaz Şərif və Prezident Asif Əli Zərdari ilə ikitərəfli görüşlər keçirdi. Həmçinin səfər çərçivəsində əməkdaşlığın müxtəlif sahələrini əhatə edən 15 sənədin mübadiləsi Azərbaycan və Pakistan arasında müqavilə-hüquq bazasını daha da genişləndirdi. Ötən il Bakıda təşkil olunan beynəlxalq iqlim sammiti - COP29 çərçivəsində Prezident İlham Əliyev və Pakistanın Baş naziri Məhəmməd Şahbaz Şərif arasında keçirilən görüşdə ikitərəfli əlaqələrin inkişafı və müxtəlif sahələrdə əməkdaşlığın genişləndirilməsi müzakirə olundu. Hər iki tərəf qarşılıqlı səfərlərin intensivləşməsini və beynəlxalq təşkilatlar çərçivəsində əməkdaşlığın gücləndirilməsini vurğuladı.
Ölkələrimiz arasında bu cür möhkəm münasibətlərin əsasını ortaq tarix, mədəni və dini dəyərlər təşkil edir. İllərdir Pakistan Hökuməti rəsmi Bakının mövqeyini ardıcıl və prinsipial şəkildə müdafiə edir, beynəlxalq arenada Azərbaycanın maraqlarını dəstəkləyən ölkələr sırasında yer alır. Ölkələrimiz Birləşmiş Millətlər Təşkilatı (BMT), İslam Əməkdaşlıq Təşkilatı (İƏT), Qoşulmama Hərəkatı (QH) və digər beynəlxalq təşkilatlar çərçivəsində bir-birini dəstəkləməkdə davam edir. Ötən ilin sonunda Azərbaycan Pakistanın da üzv olduğu İqtisadi Əməkdaşlıq Təşkilatı (D-8) ailəsinə qoşularaq, bu qurum çərçivəsində iqtisadi əlaqələrini daha da genişləndirmək imkanı əldə etdi. Azərbaycanın D-8-ə üzvlüyü Pakistan da daxil olmaqla, digər üzv ölkələrlə ticarət, investisiya və iqtisadi əməkdaşlıq sahələrində yeni perspektivlər açıb.
Dövlət başçısı İlham Əliyevin Pakistanın Baş naziri Məhəmməd Şahbaz Şərif ilə təkbətək və geniş tərkibdə görüşlərində, mətbuata birgə bəyanatlarında, Azərbaycan-Pakistan biznes forumunda çıxışında səsləndirdiyi fikirlər ölkələrimizin malik olduğu iqtisadi imkanların əlaqələrimizin daha da möhkəmləndirilməsinə stimul verdiyini təsdiqlədi. Belə ki, ötən ilin yayında Pakistana səfəri zamanı Azərbaycanın Pakistan iqtisadiyyatına 2 milyard ABŞ dolları həcmində sərmayə yatıracağını bildirdiyini xatırladan dövlət başçısı İlham Əliyev vurğuladı ki, heyətlər bu istiqamətdə gərgin çalışıb və ötən ilin noyabrında Pakistanın Baş nazirinin COP29 çərçivəsində Bakıya səfəri zamanı bu, bir daha müzakirə edildi, konkret layihələr müəyyənləşdirildi və onlar hazırda nəzərdən keçirilir. Belə bir qərara gəlindi ki, bir ay ərzində bütün bu işlərlə bağlı razılıqlar əldə olunsun: “Ümid edirəm ki, Novruz bayramından sonra, - o, mart ayının sonuna təsadüf edir, - biz artıq əhəmiyyətli nailiyyətlər görəcəyik”.
O da bildirildi ki, enerji ilə bağlı infrastruktur sahəsinə maraq göstəririk və səfər çərçivəsində enerji şirkətlərimiz bir sıra sənədlər imzalamışdır ki, bu da praktik əməkdaşlıq elementinə çevriləcəkdir. Enerji sahəsində əməkdaşlıq daha da genişlənəcək və növbəti sahələri əhatə edəcəkdir.
Qeyd edək ki, iki qardaş ölkə arasında ticarət və investisiya sahələrində əməkdaşlığın genişləndirilməsi məqsədilə bir sıra layihələr reallaşdırılır. Azərbaycanın Pakistanla kənd təsərrüfatı, enerji, əczaçılıq, ticarət, tikinti, nəqliyyat, informasiya texnologiyaları və digər sahələrdə əməkdaşlığı üçün böyük potensialı mövcuddur. Azərbaycanın neft-qaz sənayesində qazandığı təcrübə və enerji resursları Pakistan üçün mühüm əhəmiyyət daşıyır. Pakistan isə öz növbəsində əczaçılıq, tekstil, aqrar və emal sənayesi sahələrində Azərbaycan bazarında öz mövqeyini gücləndirə bilər.
Azərbaycan və Pakistan arasında iqtisadi əlaqələrin daha da inkişaf etdirilməsi üçün qarşılıqlı ticarət maneələrinin aradan qaldırılması, gömrük və logistika sahəsində əməkdaşlığın dərinləşdirilməsi əsas məqsədlərdən biridir. Xüsusilə nəqliyyat və tranzit marşrutlarının genişləndirilməsi iki ölkə arasında ticarət dövriyyəsinin artmasına ciddi töhfə verə bilər. Azərbaycanın coğrafi mövqeyi, onun Avropa və Asiyanı birləşdirən mühüm nəqliyyat dəhlizlərinin üzərində yerləşməsi Pakistan üçün yeni ixrac imkanları yaradır.
Səfər çərçivəsində 10-dan artıq sənəd imzalandı. Münasibətlərin gələcək inkişafında hüquqi baza rolunu oynayan bu sənədlərin hər biri yeni istiqamətdir. Təhlillər əsasında bu qənaət xüsusi qeyd edilir ki, Pakistanın Baş nazirinin sözügedən səfəri ölkələrimiz arasındakı ikitərəfli münasibətlərə yeni məzmun və keyfiyyət gətirərək qarşılıqlı əməkdaşlığın daha geniş sahələri əhatə etməsini təmin edəcək.
Fəxrəddin Vəliyev
YAP Şəmkir rayon təşkilatının sədri