Qubadlı – zəfərin yolu ilə gələcəyə

Qubadlının azadlığı – Vətən müharibəsinin ən parlaq səhifələrindən biridir. Hər addımı, hər döyüşü, hər əsgəri qəhrəmanlıq dastanına çevrilən bu şəhər 44 günlük müharibə zamanı strateji əhəmiyyətinə görə çox mühüm rol oynadı. Qubadlının alınması ilə Azərbaycan Ordusu həm Qarabağın cənub istiqamətində üstünlük qazandı, həm də Şuşaya gedən yolu açdı.

25 oktyabr 2020-ci il – Azərbaycan xalqının tarixində əbədi qızıl hərflərlə yazılmış gündür. O gün Qubadlının azad olunması xəbəri yayılanda, hər bir azərbaycanlı sanki yenidən doğuldu. İnsanlar küçələrə çıxdı, bayraqlar qaldırıldı, dualar edildi. Çünki bu zəfər təkcə hərbi qələbə deyildi, həm də milli qürurun, ruhun və ədalətin qələbəsi idi.

Qubadlının azadlığı ilə birlikdə Azərbaycanın bütövlüyü bərpa olundu. Bu qələbə göstərdi ki, Azərbaycan dövləti öz vətəndaşına, torpağına və tarixinə sahib çıxan qüdrətli bir dövlətdir. Bu, həm də xalqın Ali Baş Komandana olan sonsuz etimadının və ordunun vətənə sədaqətinin sübutudur.

Azadlıqdan sonra Qubadlıda həyata keçirilən layihələr – enerji təminatı, müasir yollar, məktəblər, sosial obyektlər, kənd təsərrüfatı sahələrinin bərpası – gələcəyə yönəlmiş strateji addımlardır. Bu proses bir daha göstərir ki, Azərbaycan dövləti azad etdiyi torpaqlarda yalnız yenidənqurma deyil, həm də yeni həyat fəlsəfəsi qurur.

Bu gün Qubadlıda ucalan hər bina, salınan hər yol, bərpa olunan hər məktəb xalqın zəfər iradəsinin göstəricisidir. Uşaqlar yenidən doğma torpaqlarında təhsil alacaq, analar o yerlərin havasını bir daha dərindən ciyərlərinə çəkəcək, kəndlərdə toy sədaları eşidiləcək.

25 oktyabr – Qubadlının azadlıq, qayıdış və gələcək inam günü kimi hər bir azərbaycanlının qəlbində yaşayacaq. Qubadlı bu gün yalnız azad edilmiş şəhər deyil – o, Zəfərin, dirçəlişin və əbədi Vətənin simvoludur.

Zaur Mehdiyev,

YAP Gədəbəy rayon təşkilatının sədr müavini.