Strateji tərəfdaşlıq və qarşılıqlı etimad ŞƏRH

2026-cı il aprelin 6-da Azərbaycan Respublikasının Prezidenti İlham Əliyev Gürcüstana rəsmi səfəri çərçivəsində mətbuata verdiyi bəyanatda iki ölkə arasında mövcud olan münasibətlərin yüksək səviyyəsini və strateji əhəmiyyətini bir daha diqqətə çatdırdı. Dövlət başçısının çıxışı Azərbaycan ilə Gürcüstan arasında formalaşmış dostluq və tərəfdaşlıq əlaqələrinin möhkəm təməllərə söykəndiyini göstərdi.

Prezident qeyd etdi ki, Azərbaycan və Gürcüstan xalqları tarix boyu mehriban qonşuluq şəraitində yaşamış, qarşılıqlı hörmət və etimada əsaslanan münasibətlər qurmuşlar. Bu əlaqələr bu gün də uğurla davam etdirilir və müxtəlif sahələrdə əməkdaşlıq getdikcə genişlənir. Xüsusilə siyasi dialoqun yüksək səviyyədə olması iki ölkə arasında əlaqələrin inkişafında mühüm rol oynayır.
Dövlət başçısı çıxışında vurğuladı ki, Azərbaycan Respublikası ilə Gürcüstan Respublikası arasında əməkdaşlıq təkcə ikitərəfli münasibətlərlə məhdudlaşmır, eyni zamanda regional və beynəlxalq əhəmiyyət daşıyır. Enerji sahəsində həyata keçirilən birgə layihələr bu baxımdan xüsusi önəm kəsb edir. Bakı–Tbilisi–Ceyhan neft kəməri və Cənub Qaz Dəhlizi kimi təşəbbüslər regionun enerji təhlükəsizliyinə mühüm töhfə verir və tərəflər arasında qarşılıqlı asılılığı gücləndirir.
Prezident İlham Əliyev həmçinin nəqliyyat və logistika sahəsində əməkdaşlığın əhəmiyyətini qeyd etdi. Bakı–Tbilisi–Qars dəmir yolu və Orta Dəhliz kimi beynəlxalq layihələr Azərbaycan ilə Gürcüstanı Şərq ilə Qərb arasında əsas körpüyə çevirir. Bu layihələr regionun tranzit potensialını artırmaqla yanaşı, iqtisadi inkişafı da sürətləndirir.

Bəyanatda humanitar və mədəni əlaqələrə də toxunulub. Qeyd olunub ki, iki ölkə xalqları arasında mövcud olan tarixi dostluq münasibətləri mədəniyyət, təhsil və digər sahələrdə əməkdaşlıq üçün geniş imkanlar yaradır. Bu əlaqələr xalqlar arasında qarşılıqlı anlaşmanı daha da möhkəmləndirir.

Səfər çərçivəsində keçirilən görüşlər zamanı regional təhlükəsizlik məsələləri də müzakirə olunub. Prezident vurğulayıb ki, bölgədə sabitliyin qorunması və davamlı inkişafın təmin olunması üçün ölkələr arasında əməkdaşlığın gücləndirilməsi vacibdir. Azərbaycan bu istiqamətdə hər zaman konstruktiv mövqe nümayiş etdirir.

Prezident İlham Əliyevin Gürcüstana rəsmi səfəri və mətbuata verdiyi bəyanat bir daha təsdiq edir ki, Azərbaycan Respublikası ilə Gürcüstan Respublikası arasındakı münasibətlər strateji tərəfdaşlıq səviyyəsinə yüksəlib. Bu əlaqələr təkcə iki ölkənin maraqlarına xidmət etmir, həm də bütövlükdə regionda sülh, sabitlik və inkişafın təmin olunmasına mühüm töhfə verir.

Lalə Mədətova

YAP Kəngərli rayon təşkilatının məsləhətçisi