Strateji tərəfdaşlıq yeni mərhələdə - ŞƏRH

Azərbaycan Respublikası ilə Ukrayna Respublikası arasında münasibətlər son illərdə ardıcıl şəkildə inkişaf edərək strateji tərəfdaşlıq səviyyəsinə yüksəlib. Aprelin 25-də Azərbaycan Respublikasının Prezidenti İlham Əliyev və Ukrayna Prezidenti Volodimir Zelenski arasında keçirilən görüş və mətbuata verilən bəyanatlar bu əməkdaşlığın çoxşaxəli və dayanıqlı xarakterini bir daha nümayiş etdirdi.

Prezident İlham Əliyev bəyanatında vurğulayıb ki, iki ölkə arasında münasibətlər müntəzəm xarakter daşıyır və bu, yüksək səviyyəli siyasi dialoqun göstəricisidir. Dövlət başçısı qeyd edib ki, son illər ərzində liderlər arasında keçirilən çoxsaylı görüşlər qarşılıqlı etimadın möhkəmlənməsinə və əməkdaşlığın dərinləşməsinə xidmət edir. Bu müntəzəm təmaslar əlaqələrin sistemli və davamlı inkişaf etdiyini təsdiqləyir.

Dövlət başçısı bildirib ki, Azərbaycan və Ukrayna arasında əlaqələrin möhkəm siyasi təməli mövcuddur və bu təməl qarşılıqlı olaraq ərazi bütövlüyü və suverenliyə dəstək prinsiplərinə əsaslanır. “Azərbaycan Ukraynanın ərazi bütövlüyünü daim dəstəkləmişdir və bundan sonra da dəstəkləyəcəkdir”, – deyə Prezident İlham Əliyev qeyd edib. Bu yanaşma iki ölkə arasında münasibətlərin prinsipial və etibarlı əsaslar üzərində qurulduğunu göstərir.

Bəyanatda iqtisadi əməkdaşlıq məsələlərinə də xüsusi diqqət yetirilib. Xüsusilə SOCAR-ın Ukraynadakı fəaliyyəti əməkdaşlığın mühüm istiqamətlərindən biri kimi qiymətləndirilib. SOCAR-ın Ukrayna bazarında aktiv iştirakı enerji sahəsində tərəfdaşlığın gücləndirilməsinə, eyni zamanda iqtisadi əlaqələrin genişlənməsinə əhəmiyyətli töhfə verir. Bu fəaliyyət iki ölkə arasında qarşılıqlı investisiya və iqtisadi inteqrasiyanın dərinləşdiyini göstərir.

Prezident İlham Əliyev həmçinin qeyd edib ki, Azərbaycan və Ukrayna arasında əməkdaşlıq yalnız iqtisadi sahə ilə məhdudlaşmır. Hərbi-texniki sahədə də əməkdaşlıq mövcuddur və bu istiqamətdə qarşılıqlı fəaliyyət davam etdirilir. Bu əməkdaşlıq təhlükəsizlik sahəsində qarşılıqlı maraqlara xidmət etməklə yanaşı, tərəflər arasında etimadın daha da möhkəmlənməsinə töhfə verir.

Bundan əlavə, nəqliyyat və logistika sahələrində əməkdaşlığın genişləndirilməsi də müzakirə olunan əsas istiqamətlərdən biri olub. Regional və beynəlxalq nəqliyyat dəhlizlərinin inkişafı kontekstində Azərbaycan və Ukrayna arasında koordinasiyanın artırılması hər iki ölkə üçün strateji əhəmiyyət kəsb edir.

Bu səfər Azərbaycan-Ukrayna münasibətlərinin gələcək inkişaf trayektoriyasını müəyyən edən mühüm hadisələrdən biridir. Mövcud geosiyasi şəraitdə iki ölkə arasında əməkdaşlığın dərinləşdirilməsi həm regional sabitliyə, həm də iqtisadi inkişaf perspektivlərinə müsbət təsir göstərir.

Nəticə etibarilə, Prezident İlham Əliyevin mətbuata verdiyi bəyanat bir daha təsdiq edir ki, Azərbaycan və Ukrayna arasında münasibətlər sabit, çoxşaxəli və strateji xarakter daşıyır. Müntəzəm siyasi dialoq, iqtisadi və enerji sahəsində əməkdaşlıq, o cümlədən hərbi-texniki istiqamətdə qarşılıqlı fəaliyyət bu tərəfdaşlığın gələcəkdə daha da güclənəcəyini deməyə əsas verir.

Sevda Quluyeva

YAP Kəngərli rayon təşkilatının sədri