Cənubi Qafqazda sülh və diplomatiya - ŞƏRH

2026-cı il mayın 4-də Azərbaycan Respublikasının Prezidenti İlham Əliyev Avropa Siyasi Birliyi Zirvə toplantısı çərçivəsində keçirilən 8-ci Zirvə toplantısında videobağlantı formatında çıxış edib. Dövlət başçısının çıxışı regional və beynəlxalq gündəlikdə mühüm əhəmiyyət kəsb edən məsələləri əhatə etməklə yanaşı, Azərbaycanın sülh və əməkdaşlıq siyasətinə sadiqliyini bir daha nümayiş etdirib.

Prezident çıxışında qeyd edib ki, Cənubi Qafqazda formalaşan yeni reallıqlar sülh üçün real imkanlar yaradıb. Bu kontekstdə Ermənistanın Avropa Siyasi Birliyi Zirvə toplantısı çərçivəsində 2028-ci ildə keçiriləcək Zirvə görüşünün Azərbaycanda təşkil olunmasına dəstək verməsi müsbət siyasi siqnal kimi qiymətləndirilib. Bu addım tərəflər arasında etimadın artmasına və dialoqun dərinləşməsinə töhfə verən mühüm göstərici kimi təqdim olunub.
Dövlət başçısı vurğulayıb ki, sülh prosesinin artıq praktik nəticələri də mövcuddur. Belə ki, əldə olunmuş razılaşmalar əsasında Azərbaycan ərazisi vasitəsilə Ermənistana 28 min ton yükün çatdırılması regionda kommunikasiya xətlərinin açılması və iqtisadi əməkdaşlığın inkişafı baxımından əhəmiyyətli addımdır. Bu fakt qarşılıqlı faydalı əməkdaşlığın mümkünlüyünü açıq şəkildə nümayiş etdirir.
Prezident İlham Əliyev bəzi beynəlxalq qurumların mövqeyinə də toxunaraq bildirib ki, Avropa Parlamenti və Avropa Şurası Parlament Assambleyası Ermənistan-Azərbaycan sülh prosesində konstruktiv mövqe sərgiləmir və ikili standartlar nümayiş etdirirlər. Onun sözlərinə görə, bu cür yanaşmalar regionda davamlı sülhün əldə olunmasına xidmət etmir.
Çıxışda xüsusi olaraq qeyd olunub ki, Avropa Parlamenti ksenofobiya, islamofobiya, antisemitizm, miqrasiya problemləri, rəqabətçilik və evsiz insanların vəziyyəti kimi fundamental məsələlərin həllinə daha çox diqqət ayırmaq əvəzinə, Azərbaycanla bağlı əsassız ittihamlar irəli sürür və ölkəni hədəf alan mövqe nümayiş etdirir.
Bununla yanaşı, Prezident vurğulayıb ki, sülh prosesinə mane olmaq istəyən tərəflərin bütün səylərinə baxmayaraq, Azərbaycan sülh gündəliyinə sadiq qalır və regionda sabitliyin təmin olunması üçün ardıcıl addımlar atır. Azərbaycanın mövqeyi ondan ibarətdir ki, qarşılıqlı hörmət və beynəlxalq hüquq prinsipləri əsasında uzunmüddətli sülhə nail olmaq mümkündür.
Nəhayət, bütün bu amilləri ümumiləşdirərək demək olar ki, İlham Əliyev-in çıxışı yalnız cari vəziyyətin təsviri deyil, həm də gələcəyə yönəlmiş strateji baxışın ifadəsidir. Bu baxışın uğurla reallaşması üçün ardıcıl siyasi iradə, qarşılıqlı etimad, beynəlxalq dəstək və praktik addımların uzlaşdırılması zəruridir. Yalnız bu halda Cənubi Qafqaz regionu qarşıdurma məkanından əməkdaşlıq və inkişaf platformasına çevrilə, uzunmüddətli sülh və sabitlik real və davamlı xarakter ala bilər.
Nəticə etibarilə, bu çıxış Azərbaycanın həm regional, həm də beynəlxalq səviyyədə konstruktiv tərəfdaş kimi çıxış etdiyini, sülh və əməkdaşlıq təşəbbüslərini davamlı şəkildə irəli sürdüyünü bir daha təsdiqləyir.

Elnur Əsədov
YAP Kəngərli rayon təşkilatının əməkdaşı