Qurtuluşun işığında böyük Zəfər - ŞƏRH

Hər bir xalqın tarixində dönüm nöqtələri vardır ki, onlar gələcək nəsillər üçün həm dərs, həm də qürur mənbəyidir. Azərbaycan üçün belə mühüm tarixlərdən biri 15 İyundur – Milli Qurtuluş Günüdür. Bu gün, xalqımızın müstəqillik uğrunda mübarizəsinin yeni mərhələyə qədəm qoyduğu, dövlətçilik tarixində dönüş nöqtəsi yaratdığı bir gündür.

1990-cı illərin əvvəllərində Azərbaycan ağır sınaqlarla üzləşmişdi. Sovet İttifaqının dağılması fonunda ölkədə siyasi sabitlik zəifləyir, iqtisadi çətinliklər gündəlik həyatın reallığına çevrilirdi. Eyni zamanda, Ermənistan-Azərbaycan Dağlıq Qarabağ münaqişəsi ölkəni ciddi təhlükə qarşısında qoymuşdu. Bu mürəkkəb və gərgin şəraitdə, xalqın həmrəyliyi və milli iradəsi Azərbaycanın taleyini müəyyən edən əsas amillərdən biri oldu.

15 İyun 1993-cü il tarixində xalqın təkidli tələbi və siyasi müdrikliyi nəticəsində ulu öndər Heydər Əliyev siyasi hakimiyyətə qayıtdı. Onun rəhbərliyi ilə ölkədə siyasi stabillik bərpa olundu, dövlət institutları gücləndirildi və iqtisadi islahatların əsası qoyuldu. Bu tarixi hadisə, Azərbaycanda milli qurtuluş yolunun başlanğıcı hesab edilir. Ölkə yalnız daxili qarşıdurmaları aradan qaldırmaqla kifayətlənmədi, həm də beynəlxalq aləmdə öz mövqeyini bərpa etdi.

Milli Qurtuluş Günü, eyni zamanda xalqın həmrəyliyinin, vətənpərvərliyinin və milli iradəsinin simvoludur. 15 İyun, göstərir ki, hər çətinlikdən çıxış yolu vardır, əgər xalq öz birliyini qoruyar, milli maraqlarını üstün tutsun. Bu gün, gənc nəsil üçün həm tarixi dərs, həm də gələcəyə yönəlik örnəkdir.

Tarixi qələbəyə aparan yol, yalnız siyasi dəyişikliklərlə deyil, həm də xalqın milli şüurunun yüksəlməsi, mədəniyyət və təhsil sahələrində atılan addımlarla mümkündür. Bugünkü müstəqil, güclü və inkişaf edən Azərbaycan məhz 15 İyun hadisələrinin nəticəsi olaraq dünya səhnəsində öz layiqli yerini tutur.

Milli Qurtuluş Günü yalnız keçmişin xatirəsi deyil, eyni zamanda gələcəyə aparan yolun işığıdır. Hər il bu tarixi anı yad edərkən, xalqımızın həmrəyliyi, dövlətimizə bağlılığı və milli müstəqilliyimizə olan sevgi yenidən təkrar olunur. Tarixi qələbəyə aparan yol, birlik və iradə ilə yazılmışdır – və bu yol hələ çox nəsillərə ilham verməyə davam edəcək.

Mahir Qurbanov

YAP Kəngərli rayon təşkilatının fəalı