Enerji təhlükəsizliyi milli təhlükəsizliyin əsas təminatçısıdır - ŞƏRH

Müasir beynəlxalq münasibətlər sistemində enerji təhlükəsizliyi artıq təkcə iqtisadi inkişafın deyil, həm də dövlətlərin milli təhlükəsizliyinin əsas dayaqlarından birinə çevrilmişdir. Qlobal enerji bazarlarında baş verən dəyişikliklər, geosiyasi gərginliklər, enerji daşıyıcılarına artan tələbat və təchizat zəncirində yaranan risklər göstərir ki, enerji resurslarına etibarlı çıxış hər bir dövlət üçün strateji əhəmiyyət daşıyır.

Son illərdə dünyada baş verən geosiyasi proseslər enerji təhlükəsizliyi məsələsini dövlət siyasətinin prioritet istiqamətlərindən birinə çevirib. Enerji resurslarının siyasi təzyiq vasitəsinə çevrilməsi, yeni nəqli marşrutlarının formalaşdırılması və alternativ mənbələrin inkişaf etdirilməsi dövlətləri daha etibarlı tərəfdaşlarla əməkdaşlığa sövq edir. Bu baxımdan Azərbaycan zəngin enerji ehtiyatlarına, müasir infrastrukturuna və etibarlı tərəfdaş imicinə malik ölkə kimi xüsusi əhəmiyyət kəsb edir.
Azərbaycanın həyata keçirdiyi enerji strategiyasının əsas məqsədi təkcə milli iqtisadiyyatın inkişafı deyil, həm də regional və qlobal enerji təhlükəsizliyinə töhfə verməkdir. Prezident İlham Əliyevin rəhbərliyi ilə həyata keçirilən neft və qaz layihələri ölkənin beynəlxalq nüfuzunu daha da artırmışdır. Xəzər dənizinin enerji ehtiyatlarının dünya bazarına çıxarılması istiqamətində reallaşdırılan layihələr Azərbaycanın strateji mövqeyini möhkəmləndirmişdir.
Bu gün Azərbaycanın enerji siyasətinin ən mühüm nailiyyətlərindən biri Cənub Qaz Dəhlizidir. Təxminən 3500 kilometr uzunluğunda olan bu nəhəng enerji infrastrukturu Azərbaycan qazını Avropa bazarına təhlükəsiz və fasiləsiz şəkildə çatdırır. Layihənin uğurla həyata keçirilməsi nəticəsində Avropa İttifaqının bir sıra üzv dövlətləri enerji mənbələrinin şaxələndirilməsi imkanını əldə etmişdir. Prezident İlham Əliyevin qeyd etdiyi kimi, Azərbaycan qazı hazırda Avropa İttifaqının on üzv dövlətinə ixrac edilir və gələcəkdə bu coğrafiyanın daha da genişləndirilməsi üçün böyük potensial mövcuddur.
Azərbaycanın enerji siyasətində etibarlılıq əsas prinsiplərdən biridir. Ölkəmiz uzun illər ərzində imzaladığı bütün beynəlxalq müqavilələrə sadiq qalmış, tərəfdaşları qarşısında öhdəliklərini vaxtında və tam şəkildə yerinə yetirmişdir. Bu amil Azərbaycanın beynəlxalq enerji bazarında etibarlı tərəfdaş kimi tanınmasına səbəb olmuşdur. Məhz buna görə də Avropa İttifaqı Azərbaycanla enerji əməkdaşlığının genişləndirilməsində maraqlıdır.
Enerji təhlükəsizliyi yalnız enerji resurslarının mövcudluğu ilə məhdudlaşmır. Buraya onların təhlükəsiz hasilatı, etibarlı nəqli, davamlı ixracı və bazarlara fasiləsiz çatdırılması da daxildir. Azərbaycan bu istiqamətdə böyük maliyyə və siyasi resurslar sərf etmiş, müasir boru kəmərləri sistemi yaratmış və beynəlxalq enerji layihələrinin təşəbbüskarı olmuşdur.
Eyni zamanda, Azərbaycan enerji sektorunda yaşıl enerjinin inkişafına da xüsusi diqqət yetirir. Qarabağ və Şərqi Zəngəzur iqtisadi rayonlarının “yaşıl enerji zonası” elan edilməsi, külək və günəş elektrik stansiyalarının tikintisi, bərpa olunan enerji sahəsində beynəlxalq şirkətlərlə əməkdaşlıq ölkənin enerji siyasətinin yeni mərhələyə qədəm qoyduğunu göstərir. Bu istiqamət həm daxili enerji tələbatının daha səmərəli ödənilməsinə, həm də təbii qazın ixrac imkanlarının genişlənməsinə xidmət edir.
Prezident İlham Əliyevin bəyanatında vurğulandığı kimi, enerji təhlükəsizliyi milli təhlükəsizliyin ayrılmaz hissəsidir. Enerji müstəqilliyi dövlətlərin siyasi müstəqilliyini möhkəmləndirir, iqtisadi sabitliyi təmin edir və beynəlxalq münasibətlərdə onların mövqeyini gücləndirir. Azərbaycanın uğurlu enerji strategiyası ölkənin milli maraqlarının qorunmasına, iqtisadi inkişafına və beynəlxalq nüfuzunun artmasına mühüm töhfə verir.

Lalə Mədətova
YAP Kəngərli rayon təşkilatının məsləhətçisi