Milli Mətbuat: 1875-ci ilin sətirlərindən gələcəyin çağırışlarına - ŞƏRH

22 iyul Azərbaycan milli mətbuatının yaranma günü kimi ölkəmizdə hər il böyük ehtiramla qeyd olunur. 1875-ci il iyulun 22-də görkəmli maarifçi, publisist və təbiətşünas Həsən bəy Zərdabi tərəfindən nəşr olunan "Əkinçi" qəzeti Azərbaycan dilində çap edilən ilk milli qəzet olmaqla mətbuat tariximizin əsasını qoymuşdur. Maarifçilik missiyasını üzərinə götürən "Əkinçi" qısa müddətdə həm ziyalılar, həm də sadə insanlar arasında böyük maraq qazanaraq xalqın maariflənməsinə, milli şüurun formalaşmasına mühüm töhfə vermişdir. Məhz buna görə də milli mətbuat yolunda atılan ilk addım "Əkinçi" qəzeti hesab edilir.

Ulu Öndər Heydər Əliyev milli mətbuatın əhəmiyyətini belə qiymətləndirirdi: "Milli mətbuatımızın inkişaf mərhələləri Azərbaycan xalqının azadlıq, müstəqillik uğrunda mübarizə tarixinin tərkib hissəsidir. "Əkinçi"dən üzü bəri azadlıq, demokratiya, müstəqillik uğrunda mücadilə dərslərini biz milli mətbuatımızın səhifələrindən öyrənmişik." Bu fikir mətbuatın xalqın taleyində və dövlətçiliyin möhkəmlənməsində oynadığı mühüm rolu aydın şəkildə ifadə edir.
Prezident İlham Əliyev də milli mətbuatın cəmiyyət üçün əhəmiyyətini xüsusi vurğulayaraq bildirib ki, mətbuat operativ, obyektiv və qərəzsiz fəaliyyət göstərməli, milli maraqların müdafiəsinə xidmət etməlidir. Dövlət başçısı qeyd edib ki, Azərbaycanda media fəaliyyətinin inkişafı üçün geniş imkanlar yaradılıb və bu sahə daim dövlətin diqqət mərkəzindədir.
Bu gün Azərbaycan milli mətbuatı 150 illik inkişaf yolu keçərək yeni mərhələyə qədəm qoyub. İnformasiya texnologiyalarının sürətli inkişafı nəticəsində internet jurnalistikası geniş yayılıb, media rəqəmsallaşıb və yeni imkanlar əldə edib. Milli informasiya resurslarının gücləndirilməsi, jurnalistlərin sosial müdafiəsinin yaxşılaşdırılması, "Jurnalistlərin dostu" mükafatının təsis edilməsi və media sahəsində həyata keçirilən islahatlar dövlətin bu sahəyə göstərdiyi diqqətin bariz nümunəsidir.
Son illər Milli Mətbuat Gününün Qarabağın tacı Şuşada qeyd olunması xüsusi rəmzi məna daşıyır. Şuşada keçirilən Qlobal Media Forumu Azərbaycanın beynəlxalq media dialoqu üçün mühüm platformaya çevrilib. Bu forum ölkəmizin informasiya siyasətini, media azadlığını və beynəlxalq əməkdaşlığa verdiyi önəmi bir daha nümayiş etdirir.
Milli mətbuatımız dünən olduğu kimi bu gün də cəmiyyətin maariflənməsinə, milli-mənəvi dəyərlərin qorunmasına, dövlətçilik ideyalarının möhkəmləndirilməsinə və ictimai rəyin formalaşmasına xidmət edir.
Milli mətbuatımızın 150 illik tarixi Azərbaycan xalqının maarifçilik, azadlıq və dövlətçilik yolunun ayrılmaz hissəsidir. Bu gün də media cəmiyyətin düzgün məlumatlandırılması, milli maraqların qorunması və ölkəmizin beynəlxalq aləmdə obyektiv tanıdılması istiqamətində mühüm missiya yerinə yetirir. İnanırıq ki, Azərbaycan mətbuatı müasir dövrün çağırışlarına uyğun inkişaf edərək peşəkarlıq ənənələrini gələcək nəsillərə uğurla ötürəcək və dövlətimizin inkişafına öz töhfəsini verməyə davam edəcək.

Elnur Əsədov
YAP Kəngərli rayon təşkilatının əməkdaşı