Prezident sərəncam verdi: U-15 Bakıya gəlir

Prezident İlham Əliyev 15 yaşınadək oğlanlar arasında futbol üzrə ilk dünya çempionatı və festivalının 2026-cı ildə Azərbaycanda keçirilməsi ilə əlaqədar tədbirlər haqqında Sərəncam imzalayıb. Beynəlxalq Futbol Federasiyaları Assosiasiyası (FIFA) Şurası Bürosunun 2026-cı il 25 iyun tarixli iclasında 15 yaşınadək oğlanlar arasında futbol üzrə ilk dünya çempionatı və festivalının (FIFA U-15 World Cup and Festival) 2026-cı il oktyabrın 22–31-də Azərbaycanda keçirilməsi barədə qərar qəbul edilib.

İdman tarixində ilk dəfə keçiriləcək 15 yaşınadək oğlanlar arasında futbol üzrə dünya çempionatı və festivalına Azərbaycanın ev sahibliyi etməsi ölkəmizin beynəlxalq idman aləmində artan nüfuzunun daha da möhkəmlənməsinə, futbolun inkişafına və Azərbaycanın mötəbər yarışların təşkili sahəsində qazandığı təcrübənin zənginləşməsinə xidmət edəcək.

Sərəncama əsasən, 15 yaşınadək oğlanlar arasında futbol üzrə ilk dünya çempionatı və festivalının Azərbaycanda keçirilməsi ilə bağlı tədbirlərin əlaqələndirilməsi və zəruri məsələlərin həlli 20 yaşınadək kişilər arasında futbol üzrə dünya çempionatının 2027-ci ildə Azərbaycanda keçirilməsi ilə əlaqədar Azərbaycan Respublikası Prezidentinin 2025-ci il 15 dekabr tarixli 849 nömrəli Sərəncamı ilə yaradılmış Təşkilat Komitəsinə həvalə edilib. Nazirlər Kabinetinə Sərəncamdan irəli gələn məsələləri həll etmək tapşırılıb.

Məlumat üçün qeyd edək ki, bu yaş qrupu üçün keçirilən turnirlər gənc futbolçuların beynəlxalq təcrübə qazanması və gələcəkdə U-17, U-19 və əsas milli komandaya hazırlanması məqsədi daşıyır. UEFA-nın U-15 inkişaf turnirləri rəsmi Avropa çempionatı deyil, inkişaf yönümlü beynəlxalq yarışlardır.

Azərbaycanın müasir stadionları və məşq bazaları bu cür beynəlxalq turnirləri qəbul etmək üçün uyğunluğu, Azərbaycan Futbol Federasiyaları Assosiasiyasının gənc futbolçuların inkişafı üçün UEFA və FIFA ilə birgə beynəlxalq yarışlara ev sahibliyi etməsi bu turnirin Azərbaycanda keçirilməsinin başlıca səbəblərindəndir. Belə turnirlər ölkənin futbol infrastrukturunu tanıtmaq və yerli futbolçulara güclü rəqiblərlə oynamaq imkanı yaratmaq məqsədi daşıyır.