Milli qürurun və böyük dirçəlişin tarixi səhifəsi - ŞƏRH

Azərbaycanın çoxəsrlik şanlı tarixinə qızıl hərflərlə həkk olunmuş 26 avqust – Laçın Şəhəri Günü sadəcə təqvimdə adi bir bayram günü deyil, milli qürurumuzun, sarsılmaz dövlət iradəmizin və doğma yurda əbədi qayıdışımızın müqəddəs rəmzidir. Bu tarixi gün Laçının otuz ilə yaxın davam edən qaranlıq işğal dövründən sonra yenidən doğulmasının, öz tarixi-mədəni kimliyinə qovuşmasının və yeni, müasir həyata başlamasının başlanğıc nöqtəsidir.
Laçın rayonu zəngin təbii ehtiyatları, gur dağ çayları, sıx meşələri, nadir yaylaqları və qədim abidələri ilə Azərbaycan mədəniyyətinin və coğrafiyasının ən qiymətli incilərindən biridir. Eyni zamanda o, Qarabağı ölkəmizin digər bölgələri ilə birləşdirən mühüm coğrafi-strateji mövqeyə malikdir. Məhz bu geostrateji əhəmiyyətinə görə Laçın 1992-ci ilin mayında Ermənistan silahlı qüvvələrinin əsas hədəflərindən birinə çevrilərək işğal edildi. İşğal illərində Laçın şəhəri və rayonun kəndləri dəhşətli erməni vandalizminə məruz qaldı. Evlər, məktəblər, xəstəxanalar, mədəniyyət ocaqları tamamilə dağıdıldı, tarixi və dini abidələrimiz təhqir olundu, infrastruktur məhv edildi. Ermənistan tərəfi beynəlxalq hüququn norma və prinsiplərini kobud şəkildə pozaraq, Laçın ərazisində qanunsuz məskunlaşma siyasəti apardı və bölgənin tarixi simasını dəyişdirməyə çalışdı. Lakin onlar unutdular ki, torpağın əsl sahibi heç vaxt öz yurdunu unutmur və onunla bağlarını qoparmır.
2020-ci il sentyabrın 27-də başlayan 44 günlük Vətən müharibəsi Azərbaycan xalqının tarixində yeni bir şanlı eranın əsasını qoydu. Müzəffər Ali Baş Komandan, Prezident İlham Əliyevin rəhbərliyi altında rəşadətli Azərbaycan Ordusu döyüş meydanında dastan yazaraq düşməni diz çökdürdü. Hərbi sahədə qazanılan parlaq qələbələr diplomatik cəbhədə də uğurlarımızı şərtləndirdi. 2020-ci il noyabrın 10-da imzalanmış üçtərəfli Bəyanata əsasən, Ermənistan kapitulyasiya aktına imza atmağa məcbur oldu və Laçın rayonu bir güllə belə atılmadan, hərbi itki verilmədən 2020-ci il dekabrın 1-də Azərbaycana təhvil verildi.
Bununla belə, Laçın şəhəri və ətraf bir neçə kənd müvəqqəti olaraq Laçın dəhlizinin keçdiyi zonada qalırdı. Dövlətimizin qətiyyətli siyasəti nəticəsində qısa müddətdə yeni Laçın yolu çəkildi və 2022-ci il avqustun 26-da Azərbaycan Ordusu Laçın şəhərinə, həmçinin Zabux və Sus kəndlərinə daxil oldu. Şəhərin mərkəzində ucaldılan üçrəngli dövlət bayrağımız ölkəmizin ərazi bütövlüyünün tam bərpasının nümayişi idi. Dövlət başçısının həmin gün xalqa müraciətində söylədiyi “Biz bu torpaqlara qalib kimi qayıtmışıq” sözləri xalqımızın milli fəxarət nidasına çevrildi və hər bir azərbaycanlının qəlbində silinməz iz qoydu.
Bu gün Laçın erməni faşizminin dağıntılarından təmizlənərək sürətlə yenidən qurulur. Şərqi Zəngəzur iqtisadi rayonunun bu dilbər guşəsində dövlətimiz tərəfindən genişmiqyaslı quruculuq işləri həyata keçirilir. Beynəlxalq standartlara cavab verən avtomobil yolları çəkilir, mürəkkəb relyefli dağlarda tunellər salınır, həmçinin bölgənin hava nəqliyyatı əlaqələrini gücləndirəcək Laçın Beynəlxalq Hava Limanının tikintisi sürətlə davam etdirilir. Bölgənin daxili potensialından istifadə edilərək yeni su elektrik stansiyaları tikilir, Laçın "Ağıllı şəhər" və "Yaşıl enerji" zonası konsepsiyasına uyğun olaraq yenidən qurulur. Eyni zamanda, müasir memarlıq üslubunda yaşayış binaları, məktəblər, xəstəxanalar, uşaq bağçaları və istehsalat müəssisələri istifadəyə verilir.
Dövlətimizin uğurla icra etdiyi “Böyük Qayıdış” proqramı çərçivəsində yüzlərlə laçınlı ailə artıq öz doğma yurd-yuvalarına qayıdıb. Laçın küçələrində yenidən uşaq gülüşləri eşidilir, şəhərin mədəni, iqtisadi və sosial həyatı yenidən canlanır. İnsanlar uzun illər həsrətində olduqları torpaqlarda indi təhlükəsiz və firavan şəraitdə qurub-yaradırlar.
26 avqust – Laçın Şəhəri Günü təkcə bir coğrafi ərazinin azad edilməsi deyil, həm də şəhidlərimizin müqəddəs xatirəsinə uca ehtiramın, qazilərimizin fədakarlığının və gələcək nəsillərə qoyulan ən büyük mirasın təntənəsidir. Bu gün hər bir azərbaycanlı bütöv, müstəqil və güclü Azərbaycanın vətəndaşı olmaqdan sonsuz fəxarət hissi duyur. Azad Laçın artıq dirçəlişin, sarsılmaz birliyinin və böyük zəfərin simvolu kimi tariximizdə əbədi yaşayacaqdır. Bu torpaqların əsl sahibləri öz doğma yurdlarında bundan sonra hər zaman sülh, əmin-amanlıq və firavanlıq içində ömür sürəcəklər.

Eldar Əsədov
YAP Tərtər rayon təşkilatının sədri