Bu gün sülh var və müharibə dayanıb - ŞƏRH

15 sentyabr 2026-cı il tarixində Azərbaycan Respublikasının Prezidenti İlham Əliyev Türk Dövlətləri Təşkilatının (TDT) Müsəlman Dini İdarə Rəhbərləri Şurasının üzvlərini, Müsəlman Liderlərinin Sammitinin iştirakçılarını və Qafqaz Xalqları Ali Dini Şurasının üzvlərini qəbul etmişdir.

​Azərbaycanın öz gücü və iradəsi hesabına suverenliyini tam bərpa etməsi Cənubi Qafqazda onlarca il davam edən qanlı münaqişəyə və hərbi qarşıdurmaya tamamilə son qoydu. Dövlət başçısının bəyan etdiyi kimi, "Bu gün sülh var və müharibə dayanıb" fikri regionda artıq silahların susduğunun, müharibə təhlükəsinin geridə qaldığının və dayanıqlı sülh erasının başladığının ən aydın göstəricisidir. Azərbaycan tərəfindən irəli sürülən sülh gündəliyi Ermənistanla münasibətlərin tənzimlənməsinə, sərhədlərin müəyyənləşməsinə və gələcəyə yönəlmiş dinc yanaşı yaşayış modelinə hesablanıb.

​Sülhün bərqərar olması işğaldan azad edilmiş Qarabağ və Şərqi Zəngəzurda irimiqyaslı bərpa-quruculuq işlərinə tam sürətlə davam etməyə imkan verir. İşğal dövründə xalqımızın mənəvi irsinə, tarixi abidələrinə və məscidlərinə vurulan ağır zərbələr, törədilən vandalizm aktları aradan qaldırılır, dağıdılmış müqəddəs ziyarətgahlar yenidən boy qaldırır. Müharibənin bitməsi yalnız hərbi-siyasi deyil, həm də mənəvi dirçəlişin, tarixi ədalətin və mədəni irsin qorunmasının təminatına çevrilib.

​Regionda yaranmış bu sülh mühiti Türk-İslam dünyasının ideoloji birliyini və mənəvi həmrəyliyini daha da gücləndirir. TDT-yə üzv ölkələrin dini liderlərinin Bakıda bir araya gələrək eyni mövqedən çıxış etməsi dünyada artmaqda olan İslamofobiya, dini ksenofobiya və ikili standartlara qarşı ən tutarlı cavabdır. Azərbaycanın nümayiş etdirdiyi prinsipiallıq və qazandığı sülh göstərir ki, milli maraqlara və beynəlxalq hüquqa söykənən təhlükəsizlik yalnız region xalqları üçün deyil, qlobal miqyasda sabitlik üçün nümunəvi modeldir.

Vüsal Hüseynov

YAP Xocavənd rayon təşkilatının sədri