Azərbaycanın təbii resurslarının daha səmərəli istifadəsi

Bu gün Azərbaycan qeyri-neft sektorunun şaxələndirilməsi baxımından mühüm əhəmiyyət daşıyır.

Azərbaycanın 2027–2030-cu illər üçün Dövlət Proqramı çərçivəsində metallurgiya sənayesinin inkişaf etdirilməsi ölkədə yeni istehsal imkanlarının yaradılmasını nəzərdə tutur. 22 sentyabr 2026-cı il tarixdə Azərbaycan Respublikasının Prezidenti cənab İlham Əliyevin sədrliyi ilə “Azərbaycan Respublikasında 2027-2030-cu illərdə dağ-mədən (metal filizləri) və metallurgiya sənayesinin inkişafına dair Dövlət Proqramı”na həsr olunmuş müşavirə keçirilmişdir. Müşavirədə dövlətimizin başçısı çıxış edərək qeyd etmişdir ki, "Ölkə iqtisadiyyatı üçün çox perspektivli sahə olan dağ-mədən və metallurgiya sənayesinin inkişafına dair Dövlət Proqramı bu gün bizə təqdim ediləcək. Proqramın hazırlanması üçün mən bir müddət bundan əvvəl - aprelin əvvəlində müvafiq Sərəncam imzalamışam. Bu aylar ərzində proqram üzərində hazırlıq işləri gedirdi. Bu proqram bu gün bizə və Azərbaycan ictimaiyyətinə təqdim olunacaqdır. Bu sahə ölkə iqtisadiyyatı üçün, xüsusilə ölkəmizin qeyri-neft sektorunun inkişafı üçün böyük əhəmiyyət daşıyır, çox perspektivli sahədir. Düzdür, maliyyətutumlu sahədir, amma eyni zamanda, ölkəmizdə yeni, müasir sənaye istiqaməti yaradılacaqdır. Beş mindən çox daimi iş yerlərinin açılması nəzərdə tutulur. Bütövlükdə bizim təbii resurslarımızın işlənməsi və onlardan səmərəli şəkildə istifadə olunması, eyni zamanda, istehsal zəncirinin tam yaradılması ölkə iqtisadiyyatını gücləndirəcək." Proqramın qarşıdakı dörd il ərzində həyata keçirilməsi Azərbaycanın təbii resurslarının daha səmərəli istifadəsinə, yeni istehsal zəncirlərinin formalaşmasına və sənaye potensialının genişləndirilməsinə yönəlib.

Əsas hədəflərdən biri xammalın hasilatı ilə kifayətlənməyərək onun emalının və əlavə dəyər yaradan istehsal mərhələlərinin ölkə daxilində inkişaf etdirilməsidir. Prezident cənab İlham Əliyev bildirmişdir ki, son 20 il ərzində Azərbaycanda həyata keçirilən genişmiqyaslı infrastruktur layihələri ölkənin iqtisadi və enerji təhlükəsizliyinin möhkəmləndirilməsinə mühüm zəmin yaradıb. Vaxtilə təbii qaz və elektrik enerjisi idxal edən Azərbaycan bu gün öz enerji tələbatını tam təmin etməklə yanaşı, enerji resurslarını xarici bazarlara çıxaran ölkəyə çevrilib.

Prezident İlham Əliyevin müşavirədə səsləndirdiyi fikirlərdən aydın görünür ki, Azərbaycanın qarşısında duran əsas məsələ sərvətlərin sadəcə çıxarılması deyil, onlardan maksimum iqtisadi faydanın əldə edilməsidir. Filizin xammal şəklində ixracı əvəzinə onun ölkə daxilində emal olunması daha yüksək əlavə dəyər yaratmağa, yeni istehsal sahələri və iş yerləri formalaşdırmağa imkan verir.

İntiqam Quliyev

YAP Ağdam rayon təşkilatının sədr müavini