İdeoloji təhlükəsizlik məktəbdən başlayır - ŞƏRH

Müharibələr, qarşıdurmalar və ziddiyyətlərin geniş vüsət aldığı müasir dövrdə Azərbaycan sabitlik, əmin-amanlıq və təhlükəsizlik mühiti ilə dünya ölkələri arasında xüsusi yeri ilə seçilir. Prezident İlham Əliyevin həyata keçirdiyi uzaqgörən və praqmatik siyasi kursun sayəsində ölkəmiz nəinki öz ərazi bütövlüyünü və suverenliyini bərpa etdi, həm də qarşıdan gələn uzun dövr üçün dayanıqlı inkişafa etibarlı zəmin yaratdı. Bu nailiyyətləri qorumağın bir cəbhəsi də var ki, o, sərhədlərdə deyil, şüurlarda yerləşir.

Yeni reallıq və yeni risklər

Bu gün Azərbaycan regionda yeni reallığı formalaşdıran orta güc, beynəlxalq aləmin diqqət mərkəzində olan aktual məsələlərin müzakirə olunduğu mühüm platforma, sülh və təhlükəsizliyi təhdid edən problemlərin həllində uzlaşdırıcı missiya yerinə yetirən ölkə hesab olunur. Böyük iqtisadi potensial, fəal xarici siyasət, cəmiyyətimizdəki birlik və həmrəylik sayəsində ölkədə bütün daxili risklər aradan qaldırılıb. Hazırda aktual məsələlərdən biri xaricdən gələn risklərə qarşı cəmiyyətimizin güclü immunitetinin formalaşmasıdır.

Prezident İlham Əliyev Yeni Azərbaycan Partiyasının VIII Qurultayındakı çıxışında bu məsələyə xüsusi diqqət çəkib: "İdeoloji təhlükəsizlik də fiziki təhlükəsizlik kimi önəmlidir. Çünki ideoloji təxribat ölkənin içinə istiqamətləndirilir." Dövlət başçısı vurğulayıb ki, sərhədlərimizin mühafizəsinə müasir texnologiyalardan istifadə etməklə nail olmuşuq, amma ideoloji risklər sərhəd tanımır, xüsusilə internet, kiberhücumlar və süni intellekt dünyasında.

Təhsil və vətənpərvərlik: iki əsas qalxan

Bəs özümüzü ideoloji təxribatlardan necə qoruyaq? Prezidentin cavabı aydındır: "İlk növbədə, əlbəttə ki, təhsil. Xalqımız nə qədər təhsilli, bilikli, savadlı olarsa, o qədər də bu yalanlara, bu şayiələrə, zəhərlə dolu olan bu ideoloji təxribatlara uymayacaq. İkinci növbədə, vətənpərvərlik."

Bu fikir məktəbin rolunu yeni müstəvidə göstərir. Məktəb təkcə bilik vermir, uşaqlarda tənqidi düşüncə, milli kimlik və dövlətçilik şüuru formalaşdırır. Savadlı, düşünən və öz dövləti ilə fəxr edən gənc heç bir manipulyasiyanın qurbanına çevrilməz. Buna görə ideoloji təhlükəsizlik məktəb partasından başlayır.

Bugünkü uşaq dünyanı təkcə sinifdə deyil, əlindəki smartfonun ekranında da tanıyır. Sosial şəbəkələrdə yayılan məzmunun mənbəyini və məqsədini ayırd etmək, həqiqəti yalandan seçmək bacarığı məhz məktəbdə formalaşmalıdır. Müəllim bu prosesdə yol göstərən, valideyn isə övladının hansı məzmunla qarşılaşdığını izləyən əsas tərəfdaşdır.

Xarici mərkəzlərin hədəfi: uşaqlar və gənclər

Bu gün xarici mərkəzlər idarə etdikləri media və sosial media platformaları vasitəsilə ziyanlı ideoloji təbliğat apararaq vətəndaşlarımızı, xüsusilə dünyagörüşü hələ formalaşmaqda olan uşaq və gəncləri təsir altına salmağa çalışırlar. Onlar ötən əsrin əvvəllərində görkəmli ziyalılarımız, mütəfəkkirlərimiz və maarifçilərimiz tərəfindən ifşa olunan, cəmiyyətin inkişafı yolunda ciddi maneə kimi qiymətləndirilən dini-ideoloji təbliğat vasitəsilə xurafatı və mövhumatı yenidən həyat tərzimizə çevirmək istəyirlər.

Bu mərkəzlər din amilindən silah kimi istifadə edərək ölkəmizi inkişaf və tərəqqi yolundan geri döndərməyi, burada bəzi Yaxın Şərq ölkələrinin teokratik idarəetmə modelini tətbiq etməyi qarşılarına məqsəd qoyublar. Ardıcıl dini təbliğat, müxtəlif təsir və təzyiq metodları ilə məzhəblərarası ziddiyyətlərin yaradılması, vətəndaşların radikal dini cərəyanlara cəlb edilməsi, uşaq və gənclərin dünyagörüşünün dini doqmalar əsasında formalaşdırılması da bu məqsədə xidmət edir.

Hicab kampaniyasının arxasında nə dayanır?

Bəzi qonşu ölkələrdə baş örtüsü məsələsi süni şəkildə qabardılaraq "Ümumi təhsil haqqında" Qanunda edilmiş dəyişikliklərə qarşı kampaniya aparılır. Bu kampaniyanın başlıca aktorları da həmin xarici mərkəzlər və onların idarə etdiyi resurslardır. Onlar məktəbdə vahid geyim tələbini dinə qarşı addım kimi təqdim etməyə çalışırlar. Halbuki bu tələb təhsilin dünyəvi xarakterinin və şagirdlər arasında bərabərliyin qorunmasına yönəlib.

Prezident İlham Əliyev belə ideoloji təxribatların əsl məqsədini açıq ifadə edib: "Birliyimizi sarsıtmaq üçün, Azərbaycanı özlərinə tabe etdirmək üçün, bizi müstəqillik yolumuzdan döndərmək üçün, sonra da bizi idarə etmək üçün. Bax, budur məqsəd."

Dünyəvi məktəb ideoloji təhlükəsizliyin qalasıdır

Dünyəvi təhsil sistemi müxtəlif kənar ideoloji təsirlərdən, dünyəviliklə bir araya sığmayan atribut və simvolikadan azad olmalıdır. Məktəb dünyagörüşünün formalaşdığı mühüm ictimai məkandır və burada hər hansı dini ideologiyanın uşaqlar üzərində təsiri dünyəvi prinsiplərə ziddir. Vahid məktəbli forması və müəllimlər üçün dünyəviliyə uyğun işgüzar geyim tələbləri bu baxımdan ideoloji təhlükəsizliyin gündəlik tətbiqidir.

Azyaşlıların dünyagörüşünə sistemli ideoloji təsirlər onların müstəqil seçim imkanlarını məhdudlaşdırır və radikallaşma üçün əlverişli sosial-psixoloji zəmin yaradır. Buna görə radikal dini-ideoloji mərkəzlərin təsir imkanları məhdudlaşdırılmalı, onların təsirinə düşmüş qruplarla, xüsusilə valideynlərlə maarifləndirici iş aparılmalıdır.

Hər vətəndaşın vəzifəsi

Hazırda qarşıda duran başlıca vəzifə Azərbaycanın ideoloji təhlükəsizliyinin təmin edilməsi, xaricdən gələn ideoloji təhdidlərin neytrallaşdırılması, gənc nəslin və uşaqların belə təsirlərdən qorunmasıdır. Bu işdə hər bir vətəndaş fəal və ayıq-sayıq olmalı, belə cəhdləri ifşa etməli, özü yad və zərərli təsirlər altına düşməməli, övladlarını da bu təsirlərdən müdafiə etməlidir.

Müəllim dərsdə, valideyn evdə, cəmiyyət isə hər addımda bu məsuliyyəti bölüşür. Prezidentin sözləri ilə desək, hər bir vətənpərvər azərbaycanlı öz dövləti ilə fəxr edir. Bu fəxr hissini uşaqlarımıza məktəb illərindən aşılamaq ideoloji təhlükəsizliyin ən etibarlı təminatıdır.

Abbas Pənahov,

Yeni Azərbaycan Partiyası

Nəsimi rayon təşkilatının sədr müavini