Tarixi Zəfərin və Böyük Qayıdışın təntənəsi - ŞƏRH

Azərbaycan xalqının tarixində milli qürur, qəhrəmanlıq və dövlətçilik iradəsini təcəssüm etdirən əlamətdar günlərdən biri də 25 Oktyabr – Qubadlı Şəhəri Günüdür. Bu tarix xalqımızın Vətən sevgisinin, Azərbaycan Ordusunun gücünün və Müzəffər Ali Baş Komandan İlham Əliyevin rəhbərliyi ilə qazanılmış tarixi Zəfərin rəmzidir.

Qubadlı şəhəri 1993-cü ildə Ermənistan silahlı qüvvələri tərəfindən işğal edilmiş, şəhərin sakinləri doğma yurdlarından didərgin düşmüşlər. Uzun illər ərzində qubadlılılar doğma torpaqlarına qayıtmaq arzusu ilə yaşamış, Azərbaycanın ərazi bütövlüyünün bərpa olunacağına inanmışlar. 2020-ci il oktyabrın 25-də Azərbaycan Ordusu Qubadlı şəhərini işğaldan azad edərək xalqımıza böyük sevinc yaşatmışdır. Bu qələbə 44 günlük Vətən müharibəsinin mühüm uğurlarından biri olmaqla, Azərbaycan əsgərinin qəhrəmanlığını və xalqımızın sarsılmaz iradəsini nümayiş etdirmişdir.
Qubadlının azad edilməsi Azərbaycanın ərazi bütövlüyünün bərpası istiqamətində atılmış mühüm addımlardan biri olmuşdur. Prezident, Müzəffər Ali Baş Komandan İlham Əliyevin qətiyyətli rəhbərliyi, Azərbaycan Ordusunun peşəkarlığı və xalqımızın birliyi sayəsində tarixi ədalət bərpa edilmişdir. Bu Zəfər uğrunda canlarından keçən şəhidlərimizin fədakarlığı heç vaxt unudulmayacaq, qazilərimizin qəhrəmanlığı daim ehtiramla yad ediləcəkdir.
Bu gün işğaldan azad edilmiş ərazilərdə olduğu kimi, Qubadlıda da bərpa və quruculuq işləri Azərbaycanın inkişaf strategiyasının mühüm istiqamətlərindən biridir. Müasir infrastrukturun yaradılması, yolların çəkilməsi, yaşayış məntəqələrinin yenidən qurulması və sosial obyektlərin inşası doğma yurda qayıdışın təmin olunmasına xidmət edir. Həyata keçirilən layihələr Qubadlının gələcək inkişafı və əhalinin doğma torpaqlarında təhlükəsiz, firavan yaşayışı üçün geniş imkanlar yaradır.
Böyük Qayıdış proqramı çərçivəsində görülən işlər uzun illər doğma yurd həsrəti ilə yaşayan insanların arzularının gerçəkləşməsinə yönəlib. Azad Qubadlıda həyatın yenidən canlanması, quruculuq işlərinin davam etdirilməsi və bölgənin iqtisadi potensialının inkişafı Azərbaycanın gücünün, dövlətimizin öz vətəndaşlarına diqqət və qayğısının bariz nümunəsidir.
25 Oktyabr – Qubadlı Şəhəri Günü yalnız şəhərin azad edilməsini deyil, həm də milli birliyimizi, dövlət-xalq-ordu həmrəyliyini və Azərbaycan xalqının tarixi torpaqlarına bağlılığını ifadə edir. Bu əlamətdar gün gələcək nəsillərə Vətənə sədaqət, milli-mənəvi dəyərlərə hörmət və torpaqlarımızın qorunmasının müqəddəs vəzifə olduğunu aşılayır.
Qubadlı Şəhəri Günü münasibətilə bütün qubadlılıları və Azərbaycan xalqını təbrik edir, ölkəmizin ərazi bütövlüyü və suverenliyi uğrunda canlarından keçən şəhidlərimizin əziz xatirəsini dərin ehtiramla yad edirik. Azad Qubadlıda quruculuq işlərinin davam etməsini, doğma yurda qayıdan sakinlərin firavan həyat sürməsini və şəhərimizin daim inkişaf etməsini arzulayırıq.

Əli Paşayev

YAP Tərtər rayon təşkilatının məsləhətçisi