Şuşa – Təbiətin möcüzəvi sənət əsəri, Qarabağın füsunkar incisi - ŞƏRH

Azərbaycanın qədim tarixə, zəngin mədəniyyətə və bənzərsiz təbiətə malik şəhərlərindən biri olan Şuşa özünəməxsus coğrafi mövqeyi, ecazkar mənzərələri, təmiz havası və nadir təbiət gözəllikləri ilə seçilir. Qarabağın dağlıq ərazisində yerləşən bu şəhər əsrarəngiz təbiəti ilə insanı valeh edən, hər qarışında tarix və gözəllik yaşadan müqəddəs yurd yerlərimizdəndir.
Şuşanın təbii-coğrafi mövqeyi onun özünəməxsus simasını formalaşdıran əsas amillərdəndir. Dəniz səviyyəsindən təxminən 1400–1600 metr yüksəklikdə, Qarabağ yaylasının dağlıq hissəsində yerləşən şəhər sıldırım qayalıqları, dərin dərələri və ətrafını əhatə edən dağ silsilələri ilə xüsusi mənzərəyə malikdir. Şəhərin yerləşdiyi yüksəklikdən ətrafa açılan geniş mənzərə insanı heyran edir. Buradan Qarabağın dağları, meşələri və geniş vadiləri aydın şəkildə görünür.
Şuşanın təbiətini fərqləndirən başlıca xüsusiyyətlərdən biri onun zəngin relyefidir. Dağlıq ərazi, qayalıqlar, yamaclar və təbii yüksəkliklər şəhərə xüsusi gözəllik verir. Xüsusilə Cıdır düzü Şuşanın təbiət möcüzələrindən biri hesab olunur. Buradan açılan mənzərə Qarabağın əzəmətini və təbiətin yaratdığı möhtəşəmliyi bütün dolğunluğu ilə nümayiş etdirir. İsa bulağı isə sərin və şəffaf suyu, ətrafındakı yaşıllıqları, meşəlik ərazisi ilə Şuşanın ən tanınmış təbiət məkanlarındandır.
Şuşanın iqlimi də onun təbii gözəlliklərini tamamlayan mühüm xüsusiyyətlərdəndir. Dağlıq mövqeyi sayəsində burada yay ayları nisbətən mülayim və sərin, qış ayları isə soyuq və qarlı keçir. Təmiz dağ havası, zəngin bitki örtüyü və təbii su mənbələri şəhərin ekoloji baxımdan əhəmiyyətini daha da artırır. Fəsillərin dəyişməsi ilə Şuşa sanki fərqli libasa bürünür: yazda yamaclar yaşıllığa qərq olur, yayda meşələr sərinlik bəxş edir, payızda təbiət rəngarəng çalarlara boyanır, qışda isə şəhər ağappaq qar örtüyü ilə nağıllar aləmini xatırladır.
Şuşanın ətrafındakı meşələr, bulaqlar, qayalıqlar və zəngin bitki örtüyü bu ərazinin təbii sərvətlərinin mühüm hissəsidir. Burada təbiətin yaratdığı hər bir mənzərə özünəməxsus gözəlliyi ilə seçilir. Şuşanın havası, suyu, torpağı və dağ mənzərələri əsrlər boyu insanların diqqətini cəlb etmiş, şəhərin həm yaşayış, həm də istirahət məkanı kimi tanınmasına səbəb olmuşdur.

Süleyman Tağıyev
YAP Sədərək rayon təşkilatının məsləhətçisi