Güclü iqtisadiyyat, müasir ordu və tarixi Qələbə - ŞƏRH

Dövlətlərin tarixində elə mərhələlər olur ki, həmin dövrdə atılan addımlar, qəbul edilən qərarlar və müəyyənləşdirilən inkişaf strategiyası gələcək onilliklərin taleyini müəyyən edir. Azərbaycan üçün 2003-cü ildən başlayan yeni inkişaf mərhələsi məhz belə bir tarixi dövr oldu. Prezident İlham Əliyevin rəhbərliyi ilə ölkəmiz bütün sahələrdə sistemli islahatlar həyata keçirərək iqtisadi potensialını artırdı, beynəlxalq mövqelərini möhkəmləndirdi, müasir infrastruktur qurdu və müdafiə qabiliyyətini əhəmiyyətli dərəcədə gücləndirdi. Bu inkişafın başlıca məqsədlərindən biri Azərbaycanın ərazi bütövlüyünün bərpası, işğal altında olan torpaqlarımızın azad edilməsi üçün zəruri siyasi, iqtisadi və hərbi imkanların formalaşdırılması idi.

Azərbaycan Respublikasının Prezidenti, Müzəffər Ali Baş Komandan cənab İlham Əliyevin “Prezident kimi 2003-cü ildən bu günə qədər bütün addımlarım Azərbaycanın gücləndirilməsinə yönəldilmişdir. Vətən müharibəsinə qədər bütün addımlarım bir amala xidmət edirdi ki, biz torpaqlarımızı azad edək, düşməni torpağımızdan qovaq və biz buna nail olduq” fikri həmin dövrdə həyata keçirilən siyasətin mahiyyətini dolğun şəkildə ifadə edir. Dövlət başçısının rəhbərliyi ilə görülən işlər ayrı-ayrı sahələrin inkişafı ilə məhdudlaşmır, vahid strateji məqsədə – güclü, müstəqil və öz milli maraqlarını qətiyyətlə müdafiə edə bilən Azərbaycanın formalaşdırılmasına xidmət edirdi. Bu məqsədyönlü siyasət nəticəsində ölkəmiz həm iqtisadi, həm siyasi, həm də hərbi baxımdan yeni inkişaf səviyyəsinə yüksəldi.
Müstəqil dövlətin gücü, ilk növbədə, onun iqtisadi imkanları, istehsal potensialı və maliyyə resursları ilə müəyyən olunur. Prezident İlham Əliyevin rəhbərliyi dövründə Azərbaycanın iqtisadi inkişafı dövlət siyasətinin prioritet istiqamətlərindən birinə çevrildi. Neft strategiyasının uğurla davam etdirilməsi, enerji layihələrinin genişləndirilməsi, ölkəmizin beynəlxalq nəqliyyat və logistika mərkəzlərindən birinə çevrilməsi, qeyri-neft sektorunun inkişafı iqtisadiyyatın şaxələndirilməsinə və maliyyə imkanlarının artmasına şərait yaratdı. Regionların sosial-iqtisadi inkişafına dair dövlət proqramları çərçivəsində həyata keçirilən layihələr, yeni müəssisələrin yaradılması, yolların, enerji və kommunikasiya infrastrukturunun yenilənməsi Azərbaycanın ümumi inkişafına güclü təkan verdi.
Azərbaycanın iqtisadi sahədə qazandığı uğurlar onun regional və qlobal miqyasda mövqelərini də əhəmiyyətli dərəcədə gücləndirdi. Ölkəmiz beynəlxalq enerji təhlükəsizliyinin təmin edilməsində etibarlı tərəfdaş kimi tanındı, Avropanın enerji təchizatında mühüm rol qazandı, Şərq-Qərb və Şimal-Cənub nəqliyyat dəhlizlərinin inkişafında aparıcı iştirakçılardan birinə çevrildi. Bu nailiyyətlər Azərbaycanın təkcə iqtisadi imkanlarını genişləndirmədi, həm də siyasi müstəqilliyini və beynəlxalq arenada qərarvermə imkanlarını möhkəmləndirdi. Güclü iqtisadiyyat dövlətə öz strateji hədəflərini müstəqil şəkildə müəyyənləşdirmək, uzunmüddətli layihələri maliyyələşdirmək və milli təhlükəsizlik məsələlərinə daha geniş resurslar ayırmaq imkanı verdi.
İqtisadi inkişafla paralel olaraq ölkənin müdafiə qabiliyyətinin artırılması da dövlət siyasətinin əsas istiqamətlərindən biri idi. Azərbaycan rəhbərliyi yaxşı anlayırdı ki, işğal faktının aradan qaldırılması üçün yalnız beynəlxalq hüquqa və diplomatik səylərə arxalanmaq kifayət deyil, ölkənin güclü və müasir Silahlı Qüvvələrə malik olması da zəruridir. Məhz buna görə müdafiə xərcləri ildən-ilə artırılır, ordunun maddi-texniki bazası yenilənir, müasir silah və hərbi texnikanın alınmasına, müdafiə sənayesinin inkişafına xüsusi diqqət yetirilirdi. Dövlət büdcəsində hərbi xərclərin artırılması Azərbaycanın təhlükəsizlik strategiyasının tərkib hissəsi olmaqla yanaşı, ölkəmizin öz ərazi bütövlüyünü təmin etmək əzminin də göstəricisi idi.
Prezident İlham Əliyevin “Ona görə Qələbəyə aparan yol müxtəlif istiqamətlərdən keçmişdir. Əlbəttə ki, güclü Silahlı Qüvvələrin yaradılması əsas vəzifə idi və biz bunu yaratdıq” fikri bu siyasətin nə qədər düşünülmüş və ardıcıl xarakter daşıdığını göstərir. Azərbaycan Ordusunun müasir standartlara uyğun qurulması, şəxsi heyətin döyüş hazırlığının yüksəldilməsi, hərbi təhsil sisteminin təkmilləşdirilməsi, müxtəlif ölkələrin qabaqcıl təcrübələrinin öyrənilməsi və tətbiqi müdafiə sahəsində həyata keçirilən islahatların mühüm istiqamətlərini təşkil edirdi. Xüsusi təyinatlı qüvvələrin hazırlanması, hərbi hissələrin ən müasir texnologiyalarla təchiz edilməsi, pilotsuz uçuş aparatları və yüksək dəqiqlikli silah sistemlərinin arsenalımıza daxil edilməsi ordumuzun döyüş imkanlarını yeni səviyyəyə çatdırdı.
Bu istiqamətdə müdafiə sənayesinin inkişafı da xüsusi yer tuturdu. Azərbaycan yalnız xaricdən müasir hərbi texnika və silah sistemləri əldə etməklə kifayətlənməyərək, öz müdafiə sənayesi potensialını formalaşdırmağa başladı. Müxtəlif növ hərbi təyinatlı məhsulların istehsalı, yerli müəssisələrin imkanlarının genişləndirilməsi və beynəlxalq hərbi-texniki əməkdaşlığın inkişafı ordumuzun təchizat imkanlarını daha da artırdı. Bütün bunlar Azərbaycanın hərbi sahədə xarici asılılığını azaltmaqla yanaşı, müdafiə qabiliyyətinin davamlı və sistemli şəkildə gücləndirilməsinə xidmət edirdi.
2020-ci ildə başlanan Vətən müharibəsi bu uzunmüddətli hazırlığın və düşünülmüş strategiyanın real nəticələrini ortaya qoydu. Azərbaycan Ordusu döyüş meydanında yalnız say və texnika üstünlüyü ilə deyil, müasir hərb elminin nailiyyətlərinə əsaslanan əməliyyat planlaşdırılması, çevik idarəetmə və effektiv taktiki həllərlə də fərqləndi. Müharibənin gedişində pilotsuz uçuş aparatlarından, yüksək dəqiqlikli silah sistemlərindən, kəşfiyyat vasitələrindən və digər müasir texnologiyalardan məharətlə istifadə olunması dünya hərbi ekspertlərinin diqqətini cəlb etdi. Ordumuzun müxtəlif istiqamətlərdə həyata keçirdiyi əməliyyatlar, xüsusilə mürəkkəb relyefə malik ərazilərdə nümayiş etdirdiyi döyüş məharəti Azərbaycan hərbçilərinin yüksək peşəkarlığını təsdiqlədi.
XXI əsrin müharibəsinin xüsusiyyətlərini özündə əks etdirən Vətən müharibəsində Azərbaycan Ordusunun tətbiq etdiyi döyüş təcrübəsi və taktiki yanaşmalar beynəlxalq hərbi dairələrdə geniş maraq doğurdu. Müasir texnologiyaların ənənəvi döyüş üsulları ilə uzlaşdırılması, kəşfiyyat və zərbə imkanlarının əlaqələndirilməsi, əməliyyatların dəqiqliklə planlaşdırılması ordumuzun üstünlüyünü təmin edən əsas amillərdən oldu. Xüsusilə pilotsuz uçuş aparatlarının tətbiqi, düşmənin hava hücumundan müdafiə sistemlərinin sıradan çıxarılması və hərbi infrastrukturunun dəqiq zərbələrlə məhv edilməsi müasir döyüş strategiyasının yeni imkanlarını nümayiş etdirdi. Bu gün Azərbaycan Ordusunun 44 günlük müharibədə qazandığı təcrübə və tətbiq etdiyi taktiki yeniliklər müxtəlif ölkələrin hərbi mütəxəssisləri tərəfindən öyrənilir, müasir hərb elminin inkişafı baxımından diqqətlə təhlil olunur.
Bununla yanaşı, Vətən müharibəsində əldə edilən uğurun arxasında təkcə iqtisadi və hərbi hazırlıq deyil, güclü siyasi iradə, düzgün idarəetmə və milli birlik dayanırdı. Müzəffər Ali Baş Komandan İlham Əliyevin müharibə dövründə həm cəbhədəki əməliyyatları, həm də beynəlxalq informasiya müstəvisində Azərbaycanın haqq mövqeyini qətiyyətlə müdafiə etməsi ölkəmizin strateji üstünlüyünü daha da möhkəmləndirdi. Dövlət başçısının xarici media nümayəndələrinə verdiyi müsahibələr, dünya ictimaiyyətinə ünvanladığı mesajlar Azərbaycanın haqlı mübarizəsinin mahiyyətini aydın şəkildə ortaya qoydu. Cəbhədə qazanılan hərbi uğurlar siyasi-diplomatik fəaliyyətlə tamamlanaraq tarixi Qələbənin əldə olunmasına zəmin yaratdı.
8 Noyabr – Zəfər Günü Azərbaycan tarixində yalnız torpaqlarımızın işğaldan azad edildiyi gün kimi deyil, güclü dövlətin, müasir ordunun və uzaqgörən siyasətin yaratdığı tarixi nəticə kimi xüsusi yer tutur. Bu gün əldə etdiyimiz nailiyyətlər Prezident İlham Əliyevin rəhbərliyi ilə illər ərzində həyata keçirilən məqsədyönlü siyasətin bəhrəsidir. Şəhidlərimizin əziz xatirəsi, qazilərimizin fədakarlığı və Azərbaycan əsgərinin qəhrəmanlığı ilə yazılan bu tarix gələcək nəsillərə dövlətə sədaqət, Vətənə bağlılıq və milli məqsədlər uğrunda mübarizə nümunəsi olaraq qalacaqdır.

Nəcəf Kərimov,
Salyan rayon Kərimbəyli kənd İƏD üzrə nümayəndəliyin baş məsləhətçisi,
Vətən müharibəsi iştirakçısı, YAP fəalı