Hindistan və Pakistanda İranı dəstəkləyənlər küçələrə çıxıblar...

...Hindistanın Cammu və Kəşmir bölgəsində, eləcə də Pakistanda İrana hücuma qarşı kütləvi etirazlar üçüncü gündür davam edir.

Hindistanın Budhal şəhərində sakinlər Şeyxül-Ələm məscidinin qarşısında toplaşıblar.

İsrail və ABŞ-a qarşı şüarlar səsləndirən sakinlər hücumu beynəlxalq hüququn pozulması və müsəlman dünyasına qarşı təcavüz aktı adlandırıblar.

Etiraz liderlərindən biri Məhəmməd Faruq İnqlabi Xameneinin sui-qəsdini şərh edərkən bildirib ki, "suveren dövlətin rəhbərliyinə hücum beynəlxalq normalara ziddir və regional, eləcə də qlobal sabitlik üçün ciddi nəticələrə səbəb ola bilər".

SİA-nın əldə etdiyi məlumata görə, Rajuri şəhərində müsəlman gənclər "İranla həmrəylik yürüşü" təşkil ediblər. Etirazçılar şəhərdə yürüş edərək ABŞ və İsrailə qarşı şüarlar səsləndirib, bu ölkə liderlərinin portretlərini yandırıblar. Etirazlar zamanı asayişi qorumaq üçün Cammu və Kəşmir hakimiyyəti mərkəzi Srinaqar şəhərində internet xidmətini məhdudlaşdırıb və patrul xidmətini artırıb.

Bazar ertəsi günü regionun müxtəlif yerlərində 75 mitinq keçirilib.

...TASS-ın məlumatına görə, basabas və polislə toqquşmalarda altı təhlükəsizlik işçisi də daxil olmaqla ən azı 14 nəfər yaralanıb.

...Oxşar vəziyyət Pakistanda da yaşanır, burada qoşunlar Himalay bölgəsi olan Gilgit-Baltistana yerləşdirilib. Regional informasiya naziri Qulam Abbas asayişi qorumaq üçün komendant saatı elan edib.

Həftə sonu etirazçılar Gilgit-Baltistanın şiələrin çoxluq təşkil etdiyi Skardu şəhərində BMT ofisini yandırıblar.

Hərbçilərlə toqquşmalar zamanı biri əsgər də daxil olmaqla on dörd nəfər həlak olub.

Etirazçıların ABŞ konsulluğuna basqın edərək xarici müdafiə xəttini pozduğu Karaçidə daha 10 nəfər həlak olub. İslamabadda iki nəfər həlak olub.

…"Kommersant" xəbər verir ki, şimaldakı Paraçinar, Dera İsmayıl Xan və Peşəvər şəhərlərində minlərlə insan küçələrə çıxıb, lakin burada heç bir insident baş verməyib.

Əli Babayev