Avstraliya yanır: "Qara Yay" təkrarlana bilər

Avstraliyada yanğınsöndürmə xidmətləri cənub yarımkürəsində temperaturun yüksəlməyə başlaması ilə meşə yanğınları riskinin artacağı barədə xəbərdarlıq edir.

Ölkədə artıq güclü El-Ninyo iqlim hadisəsi müşahidə olunur. Bu iqlim hadisəsi adətən daha isti və quraq hava şəraiti ilə müşayiət edilir və nəticədə meşə yanğınlarının baş vermə riski yüksəlir. Qeyd edək ki, El-Ninyo (El Niño) Sakit okeanında okean səthinin temperaturunun adi haldan əhəmiyyətli dərəcədə yüksəlməsi ilə yaranan təbii iqlim hadisəsidir.

Yeni Cənubi Uels Kənd Yanğından Mühafizə Xidmətinin rəhbəri Trent Kurtin bildirib ki, bu il əvvəlki illərlə müqayisədə yanğın təhlükəsinin daha yüksək olacağı gözlənilir.

Onun sözlərinə görə, Şimal yarımkürəsində, xüsusilə Avropada hazırda müşahidə olunan ekstremal hava şəraiti ciddi narahatlıq doğurur. Avropa bu yay son dərəcə yüksək temperaturla üzləşib. Dünyanın ən sürətlə istiləşən qitəsi hesab olunan Avropanın geniş ərazilərində rekord istilər bitki örtüyünü qurudaraq genişmiqyaslı meşə yanğınlarının yayılmasına şərait yaradıb.

Böyük Britaniya müşahidələr tarixində ən isti yayını keçirib, İtaliyada isə son 75 ilin ən yüksək yay temperaturu qeydə alınıb.Kurtin bildirib ki, Avropanın bəzi bölgələrində son onilliklərdə, hətta əvvəllər görünməmiş miqyasda yanğınlar baş verib.

Avstraliya isə meşə yanğınları ilə mübarizədə böyük təcrübəyə malikdir. Ölkədə 2019–2020-ci illərdə baş verən və "Qara yay” adlandırılan meşə yanğınları zamanı Türkiyənin ərazisi böyüklüyündə sahə yanmış, 33 nəfər həyatını itirmişdi.

Yanğın riskini azaltmaq məqsədilə Avstraliya hakimiyyəti mütəmadi olaraq nəzarətli meşə yandırmaları həyata keçirir. Bu üsul zamanı meşənin müəyyən hissələri əvvəlcədən, nəzarət altında yandırılır ki, mümkün yanğın zamanı alovun sürətlə yayılması məhdudlaşdırılsın.

Yeni Cənubi Uels Meşə Korporasiyasının sektor komandiri Aleks Kapararo bildirib ki, hazırda vəziyyətə hazırdırlar, lakin təşvişə düşməyiblər. Onun sözlərinə görə, mövsümi proqnozlar bu il yanğın mövsümünün əvvəlki illərlə müqayisədə daha aktiv keçəcəyini göstərir. Əsas risk faktorları isə isti və quraq hava şəraiti olacaq.

Yeni Cənubi Uelsin şimalında yüksək yanğın təhlükəsi mövsümü adətən oktyabrın ortalarında, ştatın cənubunda isə dekabr ayında başlayır.

Lalə Mehralı