Kreml KTMT-nin Ermənistanla bağlı qərarını açıqladı

İrəvan üzvlük haqqı tam ödənilənə qədər KTMT-də yüksək vəzifələrə nümayəndələrini təyin etmək hüququndan məhrum edilib. Kollektiv Təhlükəsizlik Müqaviləsi Təşkilatının (KTMT) Kollektiv Təhlükəsizlik Şurasının iclasında Ermənistanın səsvermə hüququndan məhrum edilməsi barədə qərar qəbul edilib. Kremlin mətbuat katibi Dmitri Peskov bunu çərşənbə günü, 11 noyabrda rus təbliğatçılarına verdiyi şərhdə açıqlayıb.

"Məsələ qaldırılıb və qərar qəbul edilib. Ermənistanın bir neçə ildir təşkilatın nizamnaməsi üzrə öhdəliklərini yerinə yetirmədiyini nəzərə alaraq, Ermənistanın səsvermə hüququndan, eləcə də KTMT-də yüksək vəzifələrə nümayəndələrini təyin etmək hüququndan məhrum edilməsi təklif edilib və qərar verilib", - deyə o bildirib.

Rusiya xarici işlər naziri Sergey Lavrov da bildirib ki, "İrəvan iki ildən çoxdur ki, üzvlük haqqını ödəmir, buna görə də KTMT Nizamnaməsinin 25-ci maddəsinin müddəalarının Ermənistan Respublikasına tətbiqi məsələsi qaldırılıb".

Lavrov bildirib ki, "Qətnamə layihəsi Ermənistan vətəndaşlarının təşkilatın orqanlarında kvota vəzifələrinə namizədlik hüququnun dayandırılmasını və borc tam ödənilənə qədər səsvermə hüququndan məhrum edilməsini nəzərdə tutur".

O əlavə edib ki, "bu qərar qəbul edildikdən sonra belə, erməni həmkarlarımız Kollektiv Təhlükəsizlik Müqaviləsi çərçivəsində bütün fundamental hüquqları, o cümlədən kollektiv təhlükəsizlik hüququnu faktiki olaraq saxlayacaqlar".

Xatırladaq ki, 2024-cü ilin fevral ayında Ermənistan KTMT-dəki iştirakını dayandırıb. Baş nazir Nikol Paşinyan bildirib ki, İrəvan artıq əsas müdafiə və hərbi tərəfdaşı kimi Rusiyaya etibar edə bilməz. Bundan əvvəl Paşinyan Ermənistanın KTMT-dən çıxa biləcəyini təsdiqləyib, çünki bəzi müttəfiqlər müqavilə öhdəliklərini yerinə yetirməyiblər və "bizə qarşı Azərbaycanla birlikdə müharibə planlaşdırıblar".

Paşinyan həmçinin KTMT-nin Ermənistanın təhlükəsizliyinə, mövcudluğuna və suverenliyinə təhdid yaratdığını və Kremldə güclü reaksiya doğurduğunu bildirib.

KTMT (Kollektiv Təhlükəsizlik Müqaviləsi Təşkilatı) üzv dövlətlər arasında hərbi və siyasi sahələrdə təhlükəsizliyi və əməkdaşlığı təmin etmək üçün yaradılmış beynəlxalq təşkilatdır. Təşkilat 15 may 1992-ci ildə Özbəkistanın Daşkənd şəhərində Kollektiv Təhlükəsizlik Müqaviləsinin imzalanması ilə yaradılmışdır. Təşkilatın əsas məqsədi regionda kollektiv təhlükəsizliyi və sabitliyi təmin etmək idi. Hazırda altı ölkədən ibarətdir: Ermənistan (iştirakı dayandırılıb), Belarus, Qazaxıstan, Qırğızıstan, Rusiya və Tacikistan.

VƏLİ