"Qanunsuz aksiyanın keçirilməsi üçün heç bir zərurət yoxdur" ÖZƏL - ŞƏRH

"Radikal müxalifətin 19 oktyabrda qanunsuz aksiya keçirmək cəhdi ölkəmizdə mövcud olan sabitliyin, vətəndaşların dinc yaşayışının pozulmasına, o cümlədən, ölkəmizin beynəlxalq nüfuzuna xələl yetirilməsinə xidmət edirdi". Bunu SİA-ya Milli Məclisin deputatı Sahibə Qafarova deyib.Onun sözlərinə görə, belə bir aksiyanın keçirilməsi üçün heç bir zərurət yoxdur. "Əvvəla, bu gün Azərbaycanda həyata keçirilən sosial-iqtisadi islahatlar həm dövlətimizin qüdrətinin artmasına, həm də vətəndaşlarımızın sosial müdafiəsinin daha da gücləndirilməsinə imkan yaradıb. Azərbaycanda sosial dövlətdir və həyata keçirilın siyasətin mərkəzində Azərbaycan vətəndaşı və onun maraqları dayanır. Sosial problemlər öz həllini tapır və insanları narahat edən məsələlərin aradan qaldırılması üçün dövlətimiz tərəfindən lazımi tədbirlər görülür. Ona görə də, özünü müxalifət adlandıran, əslində isə antidövlət, antixalq fəaliyyət nümayiş etdirən azsaylı qrupların guya hansısa sosial tələblə hər hansı aksiya keçirməsinə ehtiyac yoxdur. İkincisi, prosesləri diqqətlə müşahidə edəndə aydın olur ki, bu dağıdıcı qrupların məqsədi heç də hansısa sosial məsələnin həllinə nail olmaq deyil. Onlar sadəcə bu mövzuda manipulyasiya edirlər. Burada yeganə məqsəd ictimai rəyi çaşdırmaq, qanunsuz hərəkətlərə yol vermək və təxribat törətməkdir. Əlbəttə, Azərbaycan dövləti güclü dövlətdir və bu kimi meyllərin qarşısının alınmasında qətiyyət nümayiş etdirib və bundan sonra da bu planların reallaşmasına imkan verməyəcək", - deyə Sahibə Qafarova qeyd edib.Millət vəkili S.Qafarova deyib ki, Azərbaycanda Prezident İlham Əliyevin siyasi iradəsinə uyğun olaraq genişmiqyaslı islahatlar həyata keçirilir. Azərbaycan bir çox beynəlxalq təşkilatlar tərəfindən dünyanın ən islahatçı ölkələri sırasında qiymətləndirilir. Bu islahatların başlıca məqsədi Azərbaycanı daha güclü dövlətə çevirməkdir. Amma görünür, xaricdəki bəzi antiazərbaycançı mərkəzlər, o cümlədən, onların ölkəmizdəki sifariş icraçıları bundan ciddi şəkildə narahatçılıq keçirirlər.S.Qafarova qanunsuz aksiyanın qarşısının alınması zamanı hüquq – mühafizə orqanlarının üzərinə düşən vəzifələri yerinə yetirdiyini vurğulayıb: " Hüquq – mühafizə orqanları əvvəlcədən belə bir cəhdin qarşısının qanuni şəkildə alınacağını, təşkilatçıların və qanunsuz aksiya iştirakçılarının hüquqi məsuliyyətə cəlb olunması üçün lazımi bütün addımların atılacağını bildirmişdi. Belə olduğu halda, bu xəbərdarlığa məhəl qoymadan, polisin qanuni çağırışına əməl etməyən, qanunları kobudcasına pozan təxribatçılara qarşı müvafiq tədbirlər görülməlidir və görülür. Bu gün dünyanın heç bir yerində qanunsuz aksiyanın keçirilməsinə icazə verilmir. Hətta son günlər Avropanın bəzi dövlətlərində qanunsuz aksiya iştirakçılarına qarşı hansı formada zorakılıq tətbiq edildiyini hamımız müşahidə etdik. Azərbaycanda isə asayiş keşikçiləri qanuni vəzifələrini icra edərkən heç bir qanun pozuntusuna yol vermədən radikalların sabitliyi pozmaq cəhdlərinin qarşısını layiqincə aldı. Sabitlik və təhlükəsizlik mühitinin qorunması hər bir dövlətin inkişafı üçün başlıca amildir. İmkan vermək olmaz ki, hanasısa xaricdən tapşırıq və dəstək alan qruplar bu sabitliyə xələl yetirsin".Milli Məclisin deputatı vurğulayıb ki, Azərbaycan xalqı radikal müxalifət qüvvələrinə heç bir dəstək göstərmir və onların istənilən hərəkətləri ictimai maraqdan uzaqdır. " Xalqımızın bu dağıdıcılı ünsürlərə etimad göstərməməsi, ilk növbədə Prezident İlham Əliyevə inamının, Onun həyata keçirdiyi siyasəti müdafiə etməsinin təzahürüdür. Azərbaycan xalqı Prezident İlham Əliyevin həyata keçirdiyi siyasəti tam dəstəkləyir və hər bir platformada bu dəstəyi əməli fəaliyyəti ilə nümayiş etdirir. Əminəm ki, Azərbaycan xalqı bundan sonra da bütün təxribatlara və təxribatçılara layiqli cavab verərək dövlətçiliyimizi və milli maraqlarımızı qətiyyətlə qoruyacaq", - deyə millət vəkili qeyd edib.

sia.az