Rusları yaxın gələcəkdə partlayıcı qiymət artımları gözləyirlər

...Rusların təxminən yarısı yanacaq çatışmazlığı və benzin qiymətlərinin artması fonunda inflyasiyanın sürətlənəcəyini gözləyir.

SİA-nın əldə etdiyi məlumata görə, Dialog xəbər verir ki, bu, İctimai Rəy Fondu (FOM) tərəfindən aparılan sorğuya əsasəndir.

Tədqiqata görə, respondentlərin 49 faizi qarşıdakı ayda mal və xidmətlərin qiymətlərinin əvvəlkindən daha sürətli artacağına inanır.

Bir ay əvvəl respondentlərin 35 faizi bu fikirdə idi.

Bu arada, qiymət artımının eyni tempdə davam edəcəyini gözləyənlərin payı 40 faizdən 31 faizə düşüb.

Bu aydın əhval-ruhiyyə dəyişikliyi Rusiyadakı yanacaq böhranı ilə əlaqələndirilir.

Rosstat-ın məlumatına görə, son dörd həftə ərzində benzinin qiyməti 7,9 faiz, dizel yanacağının qiyməti isə 9,5 faiz artıb. Bu fonda həftəlik inflyasiya da iyun ayında sürətlənməyə başlayıb.

...Rusiya Bankının sədri Elvira Nabiullina əvvəllər qeyd etmişdi ki, yanacaq çatışmazlığı qiymətlərin daha da artması gözləntilərini gücləndirir.

İnvestisiya bankiri Yevgeni Koqanın sözlərinə görə, qarşıdakı aylarda artan logistika xərcləri geniş çeşiddə malların qiymətlərində əks olunacaq, buna görə də yüksək inflyasiyanın ən azı yayın sonuna qədər davam etməsi ehtimalı var.

Əli Babayev