Azərbaycanla Almaniya arasında iqtisadi və siyasi əməkdaşlıq perspektivləri - ŞƏRH

Aprelin 2-də Azərbaycan və Almaniya prezidentləri İlham Əliyev və Frank-Valter Ştaynmayer Bakıda görüşərək mətbuata bəyanatlarla çıxış etdilər. Bu tarixi görüş, iki ölkə arasında əlaqələrin yeni inkişaf mərhələsinə qədəm qoyduğunu nümayiş etdirdi. Cənab Prezident İlham Əliyev bəyanatında vurğuladı ki, bu səfər Azərbaycan-Almaniya əməkdaşlığına mühüm töhfələr verəcək və iki ölkə arasında strateji tərəfdaşlığın möhkəmlənməsinə imkan yaradacaq. Azərbaycan və Almaniya arasındakı münasibətlər təkcə diplomatik sahə ilə məhdudlaşmır. İqtisadiyyat, enerji təhlükəsizliyi, ticarət dövriyyəsinin genişləndirilməsi və iqlim dəyişikliyi ilə mübarizə kimi strateji sahələr bu əlaqələrin əsas sütunlarını təşkil edir. “ Həm təkbətək görüşdə söhbət əsnasında, həm də nümayəndə heyətlərinin iştirakı ilə apardığımız danışıqlarda Almaniya-Azərbaycan əlaqələrinin gələcək inkişafı müzakirə edilmişdir. Mən tam əminəm ki, bu səfər bizim əlaqələrimizə yeni müsbət təkan verəcəkdir. İqtisadi sahədə əldə edilmiş nəticələr bizi təbii olaraq ruhlandırır. Çünki bu ilin yanvar-fevral aylarında bizim ticarət dövriyyəmiz təxminən üç dəfə artıb. Bunun əsas səbəbi Azərbaycandan Almaniyaya ixrac edilən xam neftin həcminin artması olmuşdur. Ona görə biz hesab edirik ki, gələcək illərdə öz ticarət dövriyyəmizin şaxələndirilməsi ilə bağlı daha fəal addımlar atmalıyıq, xüsusilə bərpaolunan enerji sahəsində - harada ki, Almaniya şirkətlərinin çox böyük təcrübəsi var, Azərbaycanın da çox böyük proqramı, planları var. Biz xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 giqavata çatdırmaq fikrindəyik və bu, tam realdır, bunun bir hissəsi Avropaya ixrac ediləcəkdir”. Mən şadam ki, bizim aramızda siyasi dialoq müntəzəm olaraq aparılır” – deyə Prezident İlham Əliyev qeyd etdi. Azərbaycan-Almaniya münasibətləri tarixən müsbət və dinamik inkişaf yolu keçib. İkitərəfli əlaqələr son illərdə daha intensiv xarakter alıb və bu, yüksək səviyyəli rəsmi səfərlərlə də öz təsdiqini tapır. Ötən il Prezident İlham Əliyevin Berlində keçirdiyi görüşlər bu əlaqələrin gücləndirilməsinə mühüm töhfə vermişdi. Almaniya Prezidentinin Azərbaycana ilk rəsmi səfəri isə bu dialoqun davamlılığını və əhəmiyyətini bir daha sübut etdi. Liderlər arasında keçirilən görüşdə Azərbaycan-Ermənistan sülh prosesi və regional təhlükəsizlik məsələləri də müzakirə olundu. Prezident İlham Əliyev Azərbaycanın 30 il boyunca Ermənistanın işğalı səbəbindən üzləşdiyi çətinlikləri vurğulayaraq, ölkəmizin beynəlxalq hüququn tələblərinə uyğun olaraq öz ərazi bütövlüyünü bərpa etdiyini bildirdi. “Azərbaycan bu münaqişəni və beynəlxalq hüququ özü döyüş meydanında və siyasi müstəvidə həll etmişdir” – deyə dövlət başçısı bəyan etdi. Bu tarixi Zəfər sayəsində bu gün regionda sülh və sabitlik üçün yeni imkanlar yaranıb. Azərbaycan tərəfi Ermənistanla sülh müqaviləsinin imzalanmasına konstruktiv yanaşır və artıq tərəflər arasında razılaşmaların əldə edilməsi üçün ciddi addımlar atılır. Azərbaycan və Almaniya arasında iqtisadi əlaqələrin inkişaf dinamikası diqqətçəkicidir. 2024-cü ilin ilk iki ayında iki ölkə arasında ticarət dövriyyəsi təxminən üç dəfə artıb. Bunun əsas səbəbi Azərbaycanın Almaniyaya ixrac etdiyi neftin həcminin yüksəlməsi olub. Lakin Azərbaycan iqtisadi münasibətlərin yalnız enerji sektoruna əsaslanmasını istəmir və əməkdaşlıq sahələrini daha da genişləndirməyi planlaşdırır. Prezident İlham Əliyev bu barədə bəyan etdi: “Biz hesab edirik ki, gələcək illərdə öz ticarət dövriyyəmizin şaxələndirilməsi ilə bağlı daha fəal addımlar atmalıyıq.” Xüsusilə bərpaolunan enerji sahəsində əməkdaşlıq iki ölkə üçün mühüm perspektivlər açır. Azərbaycan 2030-cu ilə qədər yaşıl enerji istehsal gücünü 6 giqavata çatdırmaq niyyətindədir və bunun bir hissəsi Avropaya ixrac ediləcək. Bu sahədə Almaniya şirkətlərinin texnoloji təcrübəsi və Azərbaycanın böyük enerji potensialı qarşılıqlı faydalı əməkdaşlıq üçün geniş imkanlar yaradır. Azərbaycanın ötən il ev sahibliyi etdiyi COP29 beynəlxalq iqlim konfransı çərçivəsində Almaniya ilə əməkdaşlıq daha da intensivləşdi. Azərbaycan qlobal iqlim dəyişiklikləri ilə mübarizədə aktiv iştirak edir və bu istiqamətdə beynəlxalq tərəfdaşları ilə birgə layihələr həyata keçirir. Prezident İlham Əliyevin sözlərinə görə, “COP29-da 197 ölkəni təmsil edən 77 mindən çox iştirakçı qeydiyyatdan keçmişdir və bu konfrans böyük, uğurlu nəticələrlə zəngin idi.” Bu sahədə Almaniya ilə əməkdaşlıq, enerji keçidinin sürətləndirilməsi və innovativ texnologiyaların tətbiqi istiqamətində geniş imkanlar açır. Azərbaycan və Almaniya prezidentləri qlobal geosiyasi vəziyyətə dair də fikir mübadiləsi apardılar. Amerika-Avropa İttifaqı arasındakı münasibətlər, Rusiya-Qərb gərginliyi və digər beynəlxalq məsələlər qlobal iqtisadiyyat və təhlükəsizlik baxımından böyük əhəmiyyət kəsb edir. Prezident İlham Əliyevin qeyd etdiyi kimi, dünya siyasətində baş verən proseslər regiona da təsir göstərir və bu məsələlərdə açıq və səmimi dialoq aparmaq vacibdir. Azərbaycanın müstəqil xarici siyasət yürütməsi və beynəlxalq arenada etibarlı tərəfdaş kimi çıxış etməsi bu gün ölkəmizi dünya miqyasında nüfuzlu oyunçulardan birinə çevirib. Almaniya Prezidentinin Azərbaycana rəsmi səfəri iki ölkə arasında strateji əməkdaşlığın güclənməsinə mühüm töhfə verəcək. “Əminəm ki, səfərin yekunları bizim ölkələrimizi bir-birinə daha da yaxın edəcəkdir,”-deyə Prezident İlham Əliyev vurğuladı. Azərbaycan və Almaniya arasında münasibətlərin dərinləşməsi təkcə iki ölkə üçün deyil, bütövlükdə region üçün əhəmiyyətlidir. Enerji, ticarət, sənaye və texnologiya sahələrində birgə layihələrin icrası iqtisadi inkişaf üçün mühüm perspektivlər açır. Bu səfər, eyni zamanda, Azərbaycan-Almaniya əlaqələrinin yeni mərhələyə qədəm qoyduğunu və iki ölkənin strateji tərəfdaşlıq istiqamətində daha da yaxınlaşdığını nümayiş etdirdi. Azərbaycan və Almaniya arasında bu yeni əməkdaşlıq mərhələsi qarşılıqlı inkişafa və tərəqqiyə yol açacaq.

Rüstəm Nağıyev,

YAP Gədəbəy rayon təşkilatının sədri