Bayram günlərində Naxçıvanda 11 mindən çox ting əkilib

Bayram günlərində muxtar respublika ərazisində meşəbərpa tədbirləri həyata keçirilib.

SİA-nın məlumatına görə, Naxçıvan Muxtar Respublikası Ekologiya və Təbii Sərvətlər Nazirliyinin mətbuat xidmətindən bildirilib ki, təbiətin qorunması və meşə sahələrinin genişləndirilməsi məqsədilə Meşələrin İnkişafı və Biomüxtəlifliyin Qorunması İdarəsi tərəfindən Nehrəm-Gölaltı Dövlət Meşəsi ərazisində 6 hektar sahədə 2600 ədəd ayland, Xalxal Dövlət Meşəsi ərazisində 3 hektar sahədə 1200 ədəd ayland, qaraağac və alça tingləri salınıb.

Qeyri-iş günlərində Tumbul Dövlət Meşəsi ərazisində 2 hektar sahədə 800, Naxçıvan şəhər Sutəmizləyici Qurğular Kompleksinin ətraf ərazisində 1,5 hektar sahədə 650, Uzunoba Dövlət Meşəsi ərazisində isə 6,5 hektar sahədə 2600 ədəd göyrüş, su anbarının yuxarı hissəsindəki ərazidə 2 hektar sahədə 940 ədəd tut, ərik, göyrüş, badam, alça, qaraağac, Əshabi-Kəhf Ziyarətgahı Dini-Mədəni Abidə Kompleksinə gedən avtomobil yolunun sağ və sol kənarındakı ərazilərdə 5 hektar sahədə 2050 ədəd badam, göyrüş, ayland, gilənar, Daşarx Meşəsi ərazisində isə 1 hektar sahədə 400 ədəd iydə, tut, söyüd, qovaq və çinar tingləri əkilib.

Ümumilikdə 27 hektar sahədə meşəbərpa işləri həyata keçirilib və 11240 ədəd müxtəlif növ ting əkilib.