Biz haqlı olaraq gənclərimizlə fəxr edirik

“Bu gün gələcəyimiz olan gənclərimizin günüdür. 2 Fevral-Azərbaycan Gəncləri Günü həm dövlətimizin gənclər siyasətinin uğurlarının, həm də gənclərimizin onlara göstərilən etimadı necə doğrultduqlarının təqdimatıdır. Keçilən yola qısa baxış gənclərimizin böyük yol keçdiyini, 1993-cü ildə Ulu Öndər Heydər Əliyevin xalqın təkidli tələbi ilə hakimiyyətə qayıdışından sonra daim diqqət və qayğısı ilə əhatə olunduqlarını təsdiqləyir. Bu diqqət və qayğı gənclərdə özünə, öz gücünə, istedadına və bacarığına inamı artırdı. Ulu Öndər Heydər Əliyevin 1997-ci ildə imzaladığı Fərmana əsasən Azərbaycan Gənclərinin I Forumunun keçirildiyi tarix- 2 fevral Azərbaycan Gəncləri Günü elan edildi. Həmin vaxtdan etibarən MDB məkanında və Şərqi Avropa ölkələri arasında ilk dəfə olaraq Azərbaycanda Gənclər Günü təntənəli şəkildə qeyd edilməyə başlanıb. Müxtəlif dövlət orqanlarının gənclərlə iş sahəsindəki fəaliyyətini əlaqələndirmək məqsədi ilə Ulu Öndər Heydər Əliyevin 1994-cü ildə imzaladığı Fərman əsasında Gənclər və İdman Nazirliyi yaradıldı. Ulu Öndərin gənclərlə bağlı imzaladığı bir çox sənədlər respublikanın ictimai-siyasi həyatında gənclərin daha fəal iştirakı üçün şərait yaratmış, gənclər siyasətinin məqsəd, prinsip və istiqamətlərini, habelə təşkilati-hüquqi əsaslarını müəyyən etmişdir. Ümummilli Liderin 1999-cu ildə imzaladığı “Dövlət gənclər siyasəti haqqında” Fərmanla gənclərin inkişafı üçün daha əlverişli şərait yaradıldı. Həmin sənədə əsasən Azərbaycanda dövlət gənclər siyasətinin həyata keçirilməsi ilə bağlı tədbirlər planı təsdiq edilmiş, Gənclər və İdman Nazirliyinin nəzdində Gənclərin problemləri üzrə elmi araşdırmalar mərkəzi yaradılmışdır. 2002-ci ildə isə gənclər siyasətinin mahiyyətini əks etdirən Qanun qəbul edildi. “Gənclər siyasəti haqqında” Qanun ölkəmizdə gənclər siyasətinin məqsədlərini, prinsiplərini, istiqamətlərini, təşkilati-hüquqi əsaslarını müəyyən edir və bu sahədə yaranan münasibətləri tənzimləyir. Ulu Öndər tərəfindən təməli qoyulmuş və bu gün Prezident İlham Əliyev tərəfindən uğurla davam etdirilən dövlət gənclər siyasəti gənc nəslin vətənpərvərlik ruhunda tərbiyəsi, onların hərtərəfli inkişafı və ölkə həyatında fəal iştirakı üçün mühüm zəmin yaradır”. Bu fikirləri Milli Məclisin deputatı Malik Həsənov bildirib.Millət vəkili qeyd edib ki, dövlətimizin başçısı İlham Əliyev gənclərin potensial imkanlarından maksimum istifadə etməyi qarşıya mühüm vəzifə kimi qoydu və gəncliyin hərtərəfli inkişafını təmin etmək üçün Fərman və sərəncamlar imzalayır, müxtəlif sahələri əhatə edən Dövlət Proqramlarını təsdiqləyir: “Prezident İlham Əliyevin Sərəncamı ilə 2007-ci il ölkəmizdə “Gənclər İli” elan edildi. Dövlətimizin başçısının sözügedən mühüm təşəbbüsü gənclərin ölkənin ictimai-siyasi və mədəni həyatında fəallığının daha da yüksəlməsinə səbəb oldu. Bu Sərəncamla “2007-ci ilin “Gənclər ili” elan olunmasına dair tədbirlər planı” təsdiq edildi, o cümlədən respublikanın şəhər və rayonlarında “Gənclər evi”nin yaradılması nəzərdə tutuldu. Paytaxt Bakı və bölgələrdə fəaliyyət göstərən “Gənclər evi” gənclərin vətənpərvər ruhunda formalaşdırılması və onların sosiallaşmasında mühüm rola malikdirlər. Gənc nəslin milli mənlik şüurunun inkişaf etdirilməsi və vətənpərvərlik hisslərinin tərbiyəsi bu cür dövlət təsisatların prioritet vəzifəsidir. Gənclər arasında vətənpərvərlik işinin gücləndirilməsi, onların ahəngdar inkişafı və asudə vaxtının təşkili, gənclərə hüquqi və informasiya yardımlarının göstərilməsi məqsədi ilə yaradılan “Gənclər evi” sosial xidmət müəssisələri şəbəkəsi genişlənməkdədir. Prezident İlham Əliyevin təşəbbüsü ilə 2011-ci ildə Azərbaycan Respublikasının Prezidenti yanında Gənclər Fondu yaradıldı. Fondun qarşısında gənclər siyasəti ilə bağlı elm, təhsil, mədəniyyət və digər sosial sahələrə yönəlmiş ictimai və sosial əhəmiyyətli, o cümlədən beynəlxalq səviyyədə həyata keçirilən layihə və proqramları qrant şəklində maliyyələşdirmək məqsədi qoyulub. 2018-ci ildə Fond yenidən təşkil edilərək Azərbaycan Respublikasının Gənclər Fondu adlandırıldı. Gənclərimizin inkişafında Heydər Əliyev Fondunun töhfələri də böyükdür. Fond gənclərin təhsili, elmi, mədəni və sosial inkişafı üçün mühüm layihələr həyata keçirir”.Malik Həsənov vurğulayıb ki, müasir dövrdə elmin və texnologiyanın inkişafı gənclərimizin qarşısında mühüm vəzifələr qoyur: “Dövlət başçısı İlham Əliyev “2015-2025-ci illərdə Azərbaycan gənclərinin İnkişaf Strategiyası”nı təsdiq etdi. Gənclərlə bağlı bütün məsələlərin geniş əhatə olunduğu bu mühüm sənədin məqsədi Azərbaycanda gənclər siyasətinin daha səmərəli həyata keçirilməsinə nail olmaq, cəmiyyətin bütün sahələrində gənclərin fəal iştirakına şərait yaratmaq, onların yaradıcı və innovativ potensialının üzə çıxarılmasını dəstəkləmək, gənclərin təhsil və məşğulluq məsələlərinə diqqəti artırmaq, müasir informasiya-kommunikasiya texnologiyalarından səmərəli istifadə etmək, ölkədə könüllülük hərəkatını inkişaf etdirmək idi. Onu da qeyd edək ki, Prezident İlham Əliyevin Sərəncamları ilə təsdiqlənən “2007-2015-ci illərdə Azərbaycan gənclərinin xarici ölkələrdə təhsil üzrə Dövlət Proqramı” və "2022-2026-cı illərdə gənclərin xarici ölkələrin nüfuzlu ali təhsil müəssisələrində təhsil almalarına dair Dövlət Proqramı” gənclərin xaricdə təhsilinə geniş imkanlar yaradıb. Azərbaycan gəncləri hər zaman yeniliyə, təkmilləşməyə böyük önəm verirlər”.Millət vəkili bu məqamı böyük qürur hissi ilə bildirib ki, bu gün hər birimiz Azərbaycan gəncinin vətənpərvərliyindən, torpaq sevgisindən bəhs edirik: “Rəşadətli Azərbaycan Ordusunun sıralarındakı qəhrəman gənclərimiz öz adlarını xalqımızın müasir tarixinə qızıl hərflərlə yazdılar. Məhz onların rəşadəti sayəsində əldə olunan bu şanlı Zəfər ölkəmizin ərazi bütövlüyünü bərpa etdi, xalqımız otuz illik həsrətdən sonra tarixi torpaqlarımıza qovuşdu. Qarabağımız və Şərqi Zəngəzurumuz cənnətə çevrilir. Artıq Şuşa, Xankəndi, Xocalı, Füzuli, Laçın, Cəbrayıl, Kəlbəcər, Ağdam şəhərləri genişmiqyaslı bərpa-quruculuq işləri fonunda sakinlərinə qovuşub. Təbii ki, bu, son deyil. Soydaşlarımız mərhələ-mərhələ dogma yurd-yuvalarına qayıdırlar. Azad edilmiş torpaqlarımız çal-çağırlı günlərini yaşayır. Azərbaycan gəncləri bu gün bayramlarını xoş ovqatda, ərazi bütövlüyümüzün və suverenliyimizin tam təmin olunmasının sevincini yaşayaraq qeyd edirlər. Suverenliyimizin tam bərpası ilə qalib Azərbaycan yeni dövrə qədəm qoyub. Yeni dövrün çağırışları gənclərimizin də məsuliyyətini artırır. Onlar yaradılan imkanlardan səmərəli istifadə edərək qarşıya qoyulan vəzifələri yüksək səviyyədə yerinə yetirməyə səy göstərirlər. Prezident, Müzəffər Ali Baş Komandan İlham Əliyevin qeyd etdiyi kimi, biz haqlı olaraq gənclərimizlə fəxr edə bilərik”.