Azərbaycan idmanının ümumi inkişafı göz qabağındadır - ŞƏRH

Müstəqillik illərində Azərbaycanda idmanın inkişafı dövlət siyasətinin əsas istiqamətlərindən birinə çevrilmişdir. Bu gün ölkəmizdə idmanın bütün sahələri üzrə əldə olunan uğurlar, beynəlxalq arenalarda qazanılan nailiyyətlər və gənclərin idmana artan marağı Azərbaycanın idman ölkəsi kimi tanınmasına səbəb olmuşdur. Azərbaycan idmanının ümumi inkişafına nəzər saldıqda hər şeyin göz qabağında olduğunu aydın şəkildə görmək mümkündür.

Azərbaycan idmanının ən parlaq sahələrindən biri olan güləş ölkəmizdə qədim ənənələrə malikdir və milli kimliyimizin ayrılmaz hissəsi hesab olunur. Güləş məktəbinin inkişafı, təcrübəli məşqçilərin fəaliyyəti və gənc idmançıların düzgün istiqamətləndirilməsi nəticəsində Azərbaycan güləşçiləri həm Avropa, həm də dünya miqyasında mühüm nailiyyətlər əldə etmişlər. Xüsusilə son dövrlərdə keçirilən beynəlxalq turnirlərdə əldə olunan uğurlar göstərir ki, ölkəmiz güləş sahəsində öz lider mövqeyini qoruyub saxlayır. Gənc nəslin bu idman növünə artan marağı isə gələcək uğurlar üçün möhkəm zəmin yaradır.
Son illər ölkəmizdə müasir idman kompleksləri, stadionlar, olimpiya mərkəzləri inşa edilmiş, regionlarda idmanın inkişafı üçün geniş imkanlar yaradılmışdır. Bu infrastruktur həm peşəkar idmançıların yetişməsinə, həm də gənclərin sağlam həyat tərzinə marağının artmasına mühüm töhfə verir. Hazırda Azərbaycanın bir çox şəhər və rayonlarında fəaliyyət göstərən olimpiya idman kompleksləri beynəlxalq standartlara cavab verir.
Azərbaycan idmançıları Olimpiya Oyunlarında, dünya və Avropa çempionatlarında uğurla çıxış edərək dövlət bayrağımızı yüksəklərə qaldırırlar.
Azərbaycanda beynəlxalq idman yarışlarının keçirilməsi də ölkəmizin nüfuzunu artırır. Avropa Oyunları, İslam Həmrəyliyi Oyunları, Formula 1 yarışları və digər beynəlxalq tədbirlər Azərbaycanın təşkilatçılıq bacarığını bütün dünyaya nümayiş etdirmişdir. Bu yarışlar həm də ölkəmizin turizm və iqtisadi inkişafına müsbət təsir göstərmişdir. İdmanın inkişafında dövlət qayğısı xüsusi rol oynayır. Eyni zamanda məktəblərdə idmanın təbliği uşaqların fiziki və mənəvi inkişafında mühüm əhəmiyyət daşıyır.
Əminliklə demək olar ki, gələcəkdə də Azərbaycan idmançıları beynəlxalq arenalarda yeni qələbələr qazanacaq, ölkəmizin adını daha da ucaldacaqlar. Bu uğurlar isə Azərbaycan xalqına sevinc bəxş edəcək və milli qürur hissini daha da gücləndirəcəkdir.

Gülnaz Rüstəmova
YAP Babək rayon təşkilatının əməkdaşı