Təhsil müəssisələrində vahid geyim qaydalarının əhəmiyyəti - ŞƏRH

Dövlət ümumi təhsil müəssisələrində şagird və müəllimlərin geyimi ilə bağlı tələblərin müəyyən edilməsi təhsil mühitində nizam-intizamın qorunması, vahid yanaşmanın təmin olunması və məktəbdaxili qaydaların düzgün tətbiqi baxımından mühüm əhəmiyyət daşıyır. Məktəbli geyimi şagirdlərin təhsil müəssisəsinə uyğun görünüşünü təmin etməklə yanaşı, onların məktəb qaydalarına məsuliyyətlə yanaşmasına da müsbət təsir göstərir. Müəllimlərin səliqəli və işgüzar geyimi isə pedaqoji fəaliyyətin xüsusiyyətlərinə uyğun olmaqla, təhsil müəssisəsində nümunəvi davranış və peşəkarlıq mühitinin formalaşmasına xidmət edir.

Azərbaycanda dövlət ümumi təhsil müəssisələrində şagirdlərin geyimi ilə bağlı tələblər Azərbaycan Respublikası Nazirlər Kabinetinin 17 mart 2022-ci il tarixli 96 nömrəli Qərarı ilə müəyyən edilmişdir. Müəllimlərin geyimi ilə bağlı tələblər isə Azərbaycan Respublikası Nazirlər Kabinetinin 6 oktyabr 2026-cı il tarixli 325 nömrəli Qərarı ilə təsdiq edilmişdir. Bu normativ hüquqi aktlar məktəblərdə geyim qaydalarının müəyyən edilmiş tələblərə uyğun həyata keçirilməsi üçün əsas yaradır.

Şagirdlərin məktəbli formasına riayət etməsi təhsil müəssisəsində vahidliyin qorunmasına və şagirdlər arasında geyimlə bağlı fərqlərin ön plana çıxmasının qarşısının alınmasına kömək edir. Bu baxımdan valideynlərin övladlarının məktəbli forması ilə təmin olunmasına diqqət yetirməsi, məktəb rəhbərliyinin isə müəyyən edilmiş qaydaların yerinə yetirilməsinə nəzarət etməsi vacibdir. Geyim tələblərinin şagirdlərə aydın şəkildə izah olunması onların məktəbdaxili qaydalara daha məsuliyyətlə yanaşmasına şərait yaradır.

Təhsilverənlərin geyiminə dair tələblər də məktəbdə işgüzar mühitin qorunması baxımından əhəmiyyətlidir. Müəllimlərin geyimi təmiz, səliqəli, sadə və peşə fəaliyyətinə uyğun olmalıdır. Eyni zamanda, geyim seçimi dərsin xüsusiyyətləri və iş şəraiti nəzərə alınmaqla həyata keçirilməlidir. Xüsusilə fiziki tərbiyə, texnologiya və laboratoriya məşğələləri zamanı təhlükəsizlik və rahatlıq baxımından uyğun geyimlərdən istifadə olunması vacibdir.

Geyim qaydalarının düzgün tətbiqi yalnız məktəb rəhbərliyinin deyil, müəllimlərin və valideynlərin də birgə məsuliyyətidir. Bu istiqamətdə maarifləndirmə işlərinin aparılması, qaydaların mahiyyətinin izah edilməsi və bütün iştirakçılar tərəfindən eyni yanaşmanın nümayiş etdirilməsi mühüm rol oynayır. Tələblərə əməl olunması zamanı qarşılıqlı hörmətin qorunması və məsələlərə məsuliyyətli yanaşılması da diqqətdə saxlanılmalıdır.

Nəticə etibarilə, dövlət ümumi təhsil müəssisələrində şagird və müəllimlərin geyim qaydalarına riayət edilməsi məktəbdə nizam-intizamın möhkəmləndirilməsinə, vahid təhsil mühitinin formalaşmasına və təhsil iştirakçılarının məsuliyyət hissinin artırılmasına xidmət edir. Bu qaydaların məqsədəuyğun və ardıcıl şəkildə tətbiqi məktəbin ümumi fəaliyyətinə müsbət təsir göstərir və tədris prosesinin daha səmərəli təşkilinə şərait yaradır.

Nərmin Azadova

"H.B.Zərdabi küç.96" (Azərbaycan Respublikası Səhiyyə Nazirliyinin Ictimai Səhiyyə və Islahatlar Mərkəzi) ünvanı üzrə ərazi partiya təşkilatının sədr müavini