16 yaşlı bir yeniyetmənin qeyri-adi həyatı: 5 ildir ki, sudan çıxmır

Hindistanın Qərbi Benqal ştatındakı Murşidabad şəhərinin sakini olan İqbal Şeyx qeyri-adi həyat tərzi sayəsində yerli bir əfsanəyə çevrilib; o, günlərini suda keçirir və həyatını müxtəlif gölməçələr arasında dolaşaraq yaşayır.

Sudan çıxan kimi bütün bədənini bürüyən dözülməz yanğı hissindən bəhs edən 16 yaşlı yeniyetmə bildirir ki, ağrıları yalnız suya yenidən girdikdə səngiyir. Bu səbəbdən, həmin gölməçələr onun üçün sadəcə sərinləmək məqsədilə getdiyi yerlər olmaqdan çıxıb; onlar əslində onun yaşayış məkanına çevrilib.

Şeyxin qeyri-adi həyat tərzi ərazidə böyük maraq doğurub. Məktəblilər və yerli sakinlər hər gün həmin gənci izləmək üçün gölməçələrin ətrafına toplaşırlar. Hətta bəziləri günlərlə suyun içində qalan Şeyxə yemək də gətirirlər.

Gəncin gölməçənin içində yemək yediyi görüntülər sosial şəbəkələrdə sürətlə yayılıb və minlərlə insanın diqqətini çəkib.

Lakin gölməçələrdə uzun müddət qalmaq Şeyxin səhhətini təhlükə altına almağa başlayıb. Yerli sakinlər bildirirlər ki, uzun müddət suya məruz qalması səbəbindən bədəninin müəyyən hissələrində, xüsusilə də əl və ayaqlarında dəri solğunlaşıb. Həmçinin məlumat verilir ki, gəncdə soyuqdəymə və öskürək əlamətləri müşahidə olunmağa başlayıb.

Ailəsi əvvəlcə Şeyx üçün yerli bir tibb mərkəzindən kömək istəmişdi. Lakin bildirilir ki, o, orada lazımi müalicəni ala bilməyib, ailəsinin isə özəl xəstəxanada müalicə xərclərini qarşılamaq üçün maddi imkanı olmayıb.

Daha da təəccüblü olan məqam odur ki, həkimlər gəncin illərdir əziyyət çəkdiyi vəziyyətin dəqiq səbəbini müəyyən edə bilməyiblər.

Milyarder məsələyə qarışıb

Bu günlərdə Şeyxin həyatında yeni bir səhifə açılıb. Hindistanın ən varlı şəxslərindən biri olan Anant Ambani 16 yaşlı yeniyetmənin vəziyyəti barədə məlumat əldə edib və onun mütəxəssislər tərəfindən müayinə olunması üçün tədbirlər görüb. Ambaninin təşəbbüsü ilə Şeyxin hərtərəfli tibbi müayinədən keçməsi məqsədilə Mumbay şəhərinə aparılması təşkil olunub.

İllərdir gölməçələrdə yaşamaq məcburiyyətində qalan gənc indi ilk dəfə olaraq tibb mütəxəssisləri tərəfindən ətraflı müayinədən keçirilir.

Nadir xəstəlik ehtimalının araşdırılması

Şeyxin bədənində hiss etdiyi güclü yanma hissinin səbəbi hələ müəyyən edilməyib. Həkimlərin nəzərdən keçirdiyi ehtimallar arasında su ilə təmas zamanı və ya təmasdan sonra narahatlıq yarada bilən nadir bir xəstəlik də var.

Digər bir ehtimal isə yanma, istilik hissi və qızartıya səbəb ola bilən nadir pozuntu-eritromelalgiyadır. Bununla belə, həkimlər qeyd edirlər ki, bu, hələlik yalnız bir ehtimaldır və dəqiq diaqnoz üçün hərtərəfli müayinələr tələb olunur.