Kreml daxilində narazılıq artır

...Rusiya siyasi elitası daxilində Ukraynadakı müharibə və onun iqtisadi nəticələri ilə bağlı fikir ayrılıqları artır.

Bunu Amerikalı jurnalist və tarixçi Emi Nayt məşhur iqtisadçı Andrey Klepaçın işdən çıxarılmasını Kremlin yüksək vəzifəli məmurlar arasında əhval-ruhiyyədən artan narahatlığı ilə əlaqələndirərək yazır.

SİA-nın əldə etdiyi məlumata görə, bu barədə The Wall Street Journal xəbər verir.

Rusiyanın keçmiş iqtisadi inkişaf nazirinin müavini və dövlətə məxsus VEB korporasiyasının baş iqtisadçısı olan Klepaç may ayının sonlarında Nikitski Klubunun qapalı iclasında çıxış edib.

O, Rusiya iqtisadiyyatının durğunluğa yaxınlaşdığını və müharibənin davam etməsinin, yeni sanksiyaların və Ukraynanın infrastruktura hücumlarının 2027-ci ildə ÜDM artımını 1-1,5 faiz ilə məhdudlaşdıra biləcəyini xəbərdar edib. Lakin onun Rusiyanın hərbi perspektivləri ilə bağlı qiymətləndirmələri ən rezonanslı olub.

...Biz qlobal yarışda - həm texnoloji, həm də iqtisadi yarışda uduzuruq, - bunu Klepaç bildirib.

Onun sözlərinə görə, Moskva bəzi cəhətlərdən hətta Ukraynadan da geridədir və uzunmüddətli qarşıdurmada qalib gələ bilməyəcək.

İqtisadçı həmçinin vəziyyəti 1917-ci il hadisələri ilə müqayisə edərək mümkün sosial böhran barədə xəbərdarlıq edib.

...Heç kim Fevral İnqilabını gözləmirdi, - deyə o qeyd edib. Çıxışının transkripti dərc edildikdən sonra Klepaç işdən çıxarıldı.

...Və maraqlıdır ki, Rusiya elitasının digər üzvləri də onun tənqidlərinə qoşuldular.

Belə ki, baş nazirin keçmiş müavini və VEB rəhbəri İqor Şuvalov iqtisadiyyatı müharibə vəziyyətinə gətirmək fikrinə qarşı çıxdı.

Sberbank-ın baş direktoru German Qref cəmiyyətin hərbi əməliyyatlara tezliklə son qoymaqda maraqlı olduğunu bildirdi.

Moskva meri Sergey Sobyanin daha da sərt danışdı.

...Normal həyatı və normal iqtisadiyyatı öldürmək ölkənin özünü öldürmək deməkdir, - deyə o bildirib.

...Klepaçın işdən çıxarılması narazılığı azaltmaq ehtimalı azdır. Əksinə, Kremlin sərt cavabı yalnız nüfuzlu məmurlar və iş adamları arasında qıcıqlanmanı artıra bilər, - Nayt yazır.

Əli Babayev