NI: Putin öz sərhədlərində “Qütb xəncəri”ni qəbul etdi...

...Amerika xüsusi təyinatlı qüvvələri Rusiya ərazisindən cəmi bir neçə kilometr aralıda Alyaskada genişmiqyaslı təlimlər keçirir.

Manevrlər Vaşinqtonun Arktikaya artan diqqəti və Amerika xüsusi təyinatlı qüvvələrinin mümkün münaqişəyə hazırlaşmaq üçün geri qayıtması fonunda keçirilir,

SİA-nın əldə etdiyi məlumata görə, bu barədə The National Interest yazır.

Polar Daqqer və Tundra Merlin təlimləri qərbi Alyaskanın adalarında və sahil ərazilərində, o cümlədən Sent-Lorens, Uels, Tin Siti və Kiçik Diomede adalarında keçirilir. Sonuncu, Çukotka Muxtar Dairəsindəki Rusiyanın Ratmanov adasından təxminən üç kilometr aralıda yerləşir.

Manevrlər ABŞ Şimal Komandanlığının Xüsusi Əməliyyatlar Komandanlığı tərəfindən təşkil olunur.

Hərbi qüvvələr arktik şəraitdə əməliyyatlar, eləcə də aviasiya və quru bölmələrinin qarşılıqlı fəaliyyətini həyata keçirir. Xüsusilə Rusiya və ABŞ-ı ayıran və Şimal Buzlu Okeanı ilə Sakit Okeanı birləşdirən Berinq Boğazı bölgəsi vacibdir. Boğazın ən dar hissəsindəki eni təxminən 85 kilometrdir ki, bu da bölgəni mühüm strateji marşruta çevirir.

ABŞ Şimal Komandanlığı bildirib ki, "bu cür təlimlər xüsusi əməliyyat qüvvələrinin Arktikada sürətlə yerləşmə qabiliyyətini nümayiş etdirir".

ABŞ Ordusunun "Yaşıl Beretlər" kimi tanınan 10-cu Xüsusi Təyinatlı Qüvvələr Qrupunun əsgərləri, eləcə də MC-130J Commando II nəqliyyat təyyarələrindən istifadə edən Hərbi Hava Qüvvələrinin şəxsi heyəti təlimlərdə iştirak edir.

Hərbi Dəniz Qüvvələrinin SEAL-ları və Dəniz Piyadaları Korpusunun bölmələri də bölgədə müntəzəm olaraq təlim keçirlər.

11 sentyabr terror hücumlarından sonra Amerika xüsusi təyinatlı qüvvələri onilliklər ərzində Əfqanıstan və İraqda antiterror əməliyyatlarına diqqət yetirib. İndi onun rolu dəyişir.

...Bu cür təlimlər komandoları Rusiya və Çin kimi imkanları baxımından müqayisə edilə bilən rəqiblərlə müharibəyə hazırlamaq üçün nəzərdə tutulub, - müəlliflər yazır.

Əli Babayev