Süni intellekt döyüşü: ABŞ və Çinin nailiyyətləri...

...ABŞ və Çin agent əsaslı süni intellekt - hərəkətləri müstəqil şəkildə planlaşdıra və daimi insan müdaxiləsi olmadan mürəkkəb tapşırıqları yerinə yetirə bilən sistemlər sahəsində liderlik uğrunda mübarizə aparmağa davam edirlər.

Lakin ölkələr fərqli yanaşmalar tətbiq edirlər və Çin tədricən ABŞ ilə texnoloji boşluğu aradan qaldırır.

SİA-nın əldə etdiyi məlumata görə, bu barədə The National Interest xəbər verir.

Amerika şirkətləri əsasən böyük biznes və dövlət qurumlarına yönəlmiş güclü qapalı modellərə diqqət yetirirlər. Bu cür sistemlərin hazırlanması böyük investisiya tələb edir: qabaqcıl yeni nəsil modellərin hazırlanması artıq yüz milyonlarla dollara başa gəlir.

Çin isə əksinə olaraq daha ucuz açıq miqyaslı modellərə və "bilik distilləsi" texnologiyasına üstünlük verir.

Bu texnologiya kiçik sistemlərin daha güclü modellərin nəticələrindən istifadə edərək öyrədilməsinə imkan verir.

Bu, Çinli tərtibatçılara rəqabətli məhsulları daha sürətli buraxmağa və onları xeyli aşağı qiymətlərlə təklif etməyə imkan verir.

...Sürət və xərc səmərəliliyi artıq orijinallıqla müqayisə edilə bilər, - deyə təhlil müəllifləri qeyd edirlər.

Xərc fərqi xüsusilə nəzərə çarpır.

Tədqiqata görə, bəzi Çin modelləri istifadəçilər üçün amerikalı həmkarlarından on dəfələrlə ucuzdur. Açıq yanaşma həmçinin Çinli tərtibatçılara texnologiyalarını sərhədlərindən kənarda daha tez yaymağa kömək edir. Lakin, Çinin üstünlüyü hələ mütləq deyil.

Testlər göstərib ki, bəzi Çin modelləri mürəkkəb çoxmərhələli tapşırıqlarda, xüsusən də kiberhücumlarda Amerika modellərindən xeyli geridədir.

ABŞ performans baxımından lider olaraq qalır, lakin yüksək xərclər və Amerika texnologiyasına qeyri-sabit giriş Vaşinqtona qarşı işləyə bilər.

Tədqiqatçılar hesab edirlər ki, "Agent əsaslı süni intellekt uğrunda mübarizə yalnız ən ağıllı modeli kimin yaratdığı ilə deyil, həm də dünyanın qalan hissəsinin hansı ekosistemini seçməsi ilə müəyyən ediləcək".

Nazlı Almuradova