ABŞ-ın dövlət borcu 40 trilyon dolları keçdi

ABŞ-ın dövlət borcu Donald Trampın ikinci prezidentlik dövrünün ilk 19 ayında 40 trilyon dolları ötüb. Borcun artması ilə yanaşı, dövlət borcuna xidmət xərcləri də yüksəlib.

Tramp prezident seçki kampaniyası zamanı dövlət xərclərini azaltmaq, federal hökumətin miqyasını kiçiltmək və büdcə kəsirini iqtisadi artımla nəzarətə almaq vədi vermişdi. Lakin Reuters-in məlumatına görə, onun ikinci prezidentlik dövründə federal xərclər azalmayıb və dövlət borcu artmaqda davam edib.

Konqresin Büdcə Ofisinin hesablamalarına əsasən, Trampın ikinci prezidentlik dövründə qəbul edilən vergi və immiqrasiya qanunu ABŞ-ın borcuna əlavə 4,7 trilyon dollar yük gətirəcək. Trampın ilk prezidentlik dövründəki vergi güzəştlərinin isə borcu 8,4 trilyon dollar artırdığı bildirilir.

ABŞ-ın borclanma xərcləri də yüksəlib. Dövlət istiqrazlarının gəlirliliyinin artması ipoteka kreditləri üzrə faizlərə və digər borclanma xərclərinə təsir göstərir.

Mütəxəssislər hesab edirlər ki, borcun artması gələcəkdə ABŞ Konqresini vergiləri artırmaq və ya sosial proqramlar, o cümlədən pensiya ödənişləri üzrə xərcləri azaltmaq kimi siyasi baxımdan çətin qərarlar qəbul etməyə məcbur edə bilər.

Tramp administrasiyası isə dövlət xərclərində islahatlar apardığını və israfçılığın qarşısını almağa çalışdığını bildirir. Prezident iqtisadi artımın borc probleminin həllinə kömək edəcəyini düşünür. Bununla belə, iqtisadçılar hesab edirlər ki, xərclərin kifayət qədər azaldılmaması ABŞ-ın onsuz da çətin olan maliyyə vəziyyətini daha da ağırlaşdırır.