Televiziya aparıcısı edam cəzasına məhkum edildi - Misirdə

Qahirə Cinayət Məhkəməsi televiziya aparıcısı Sara Xəlifə və daha 11 nəfəri narkotik istehsalı və yayılması ittihamı ilə edam cəzasına məhkum edib. SİA Əl-Əhram qəzetinə istinadən xəbər verir ki, iş üzrə ümumilikdə 28 nəfər ittiham olunub. Yeddi nəfər bəraət alıb. Məhkəmə doqquz nəfəri ömürlük həbs cəzasına məhkum edib. Qərardan Kassasiya Məhkəməsinə şikayət verilə bilər.

Müstəntiqlərin sözlərinə görə, təqsirləndirilən şəxslər ölkəyə narkotik maddələri idxal edib və onları sonrakı paylama üçün istehsal ediblər. Polis təqsirləndirilən şəxslərin laboratoriya kimi istifadə etdikləri yaşayış binasında 750 kq-dan çox narkotik və onların komponentlərini aşkar edib. Orada silah və sursat da tapılıb.

Bundan əlavə, məhkəmə jurnalisti və digər təqsirləndirilən şəxsləri gənc oğlana hücum və adam oğurluğu ilə bağlı ayrı bir iş üzrə beş il həbs cəzasına məhkum edib.

Otuz doqquz yaşlı televiziya aparıcısı Sara Xəlifə 2025-ci ilin aprelində həbs edilib. Əvvəllər o, cinayətkarlığa yönəlmiş "Missiya: Mümkün deyil" verilişinin aparıcısı olub. Misir qanunvericiliyi qəsdən adam öldürmə, terrorizm, müəyyən cinsi cinayətlər və narkotik qaçaqmalçılığı üçün ölüm cəzası nəzərdə tutur. 2025-ci ildə ölkə məhkəmələri 541 ölüm hökmü çıxarıb.

VƏLİ