WSJ: Sovet boru kəmərlərinin dərinliyində yeraltı döyüş...

...Rusiya və Ukrayna qoşunları dron nəzarətindən yayınmaq və düşmənin arxa ərazilərinə daxil olmaq üçün yeraltı boru kəmərlərindən istifadə edirlər.

SİA-nın əldə etdiyi məlumata görə, The Wall Street Journal xəbər verir ki, Kupyansk yaxınlığında Ukraynanın 13-cü "Nizamnamə" ("Xartiya") briqadasının döyüşçüləri sığınacaq və gizli marşrutlara çevirdikləri borulardan Rusiya qüvvələrini sıxışdırmağa çalışaraq "Veles" əməliyyatı keçirirlər.

Təxminən 1,2 metr diametrli boruların içərisində Rusiya qoşunları barrikadalar qurur və mövqelər yaradır.

Döyüşlər son dərəcə yaxın məsafədə gedir.

Ukrayna bölmələri əvvəlcə boru çıxışlarını artilleriya və hava hücumları ilə məhv etməyə çalışdılar.

Lakin Rusiya qoşunları tez bir zamanda yeni keçidlər qazdılar. Nəticədə qarşıdurma bir növ "gizlənpaç"a çevrildi. Qalın polad və torpaq təbəqəsi yeraltı tikililəri məhv etməyi çətinləşdirir.

Buna görə də Ukrayna Silahlı Qüvvələri partlayıcı maddələr və uzaqdan idarə olunan pulemyotlarla silahlanmış yerüstü dronlardan istifadə edir.

"Nizamnamə" briqadasının məlumatına görə, Ukrayna qüvvələri 30-dan çox rus əsgərini əsir götürüb və 100-dən çoxunu öldürüb.

Dronların çoxalması hər iki ordunun taktikasını dəyişdirir; hava aşkarlamasının daimi təhlükəsi qoşunları yeraltında sığınacaq axtarmağa məcbur edir.

Rusiya yeraltı döyüşlər üçün bölmələr yaradır, Ukrayna isə qorunan məkanlardan qərargahlar, xəstəxanalar və təlim müəssisələri yerləşdirmək üçün istifadə edir.

Yeraltı infrastruktur ayrı bir döyüş meydanına çevrilir və hərbi ekspertlər bu cür əməliyyatların daha da genişlənəcəyini gözləyirlər.

Əli Babayev