Əlcəzairin Energetika Nazirliyi ilin sonuna qədər İtaliyaya əlavə 10 milyard kubmetr təbii qaz göndəriləcəyini açıqlayıb. SİA xəbər verir ki, Əlcəzairin rəsmi agentliyi APS-in məlumatına görə, nazirlikdən verilən açıqlamada, Əlcəzairin bu günə qədər 17,8 milyard kubmetr qaz tədarük edərək İtaliyaya olan öhdəliklərini yerinə yetirdiyi və Əlcəzairin İtaliyaya ilk qaz tədarükçüsü mövqeyini gücləndirdiyi vurğulanıb və İtaliyanın əlavə qaz alacağı qeyd edilib. Əlcəzair prezidenti Əbdülməcid Tebbun iyulun 18-də ölkəsinin İtaliyaya təbii qaz nəqlinin həcmini artıracağını açıqlayıb. Əlcəzair İtaliyaya təbii qazı İtaliyanın Siciliya adasını Tunis vasitəsilə Əlcəzairə birləşdirən və ildə 32 milyard kubmetr maksimum nəql gücünə malik Trans-Aralıq dənizi boru kəməri ilə təmin edir.
sia.az