"Damcı-damcı göl olar" - böyük uğurların kiçik sirri - KÖŞƏ

"Damcı-damcı göl olar".Bu atalar sözünü demək olar ki, hamımız uşaqlıqdan eşitmişik. Valideynlərimiz qənaət etməyi öyrədərkən, müəllimlərimiz səbirli olmağı tövsiyə edərkən bu ifadəni tez-tez işlədirdilər. Amma yaş artdıqca sanki bu sözün mənasını unutmağa başladıq.Müasir dövr hər şeyi sürətlə istəyir. Bir gündə uğur qazanmaq, qısa zamanda varlanmaq, bir neçə həftəyə məşhur olmaq... Sosial şəbəkələr də bu düşüncəni daha da gücləndirir. İnsanlar yalnız nəticəni görür, amma o nəticənin arxasında illərlə çəkilən zəhməti görmürlər.Halbuki təbiətin özü bizə başqa həqiqəti öyrədir. Böyük çaylar kiçik bulaqlardan başlayır. Ən hündür ağac belə bir vaxtlar torpağa düşmüş kiçik toxum idi. Uşaq bir gündə böyümür, elm bir gündə öyrənilmir, peşəkarlıq bir gecədə yaranmır.İnsan həyatı da belədir. Gündə oxunan on səhifə kitab, hər gün öyrənilən bir yeni söz, edilən kiçik yaxşılıq, qənaət edilən az miqdarda pul... Bunların hər biri ilk baxışda əhəmiyyətsiz görünə bilər. Amma illər keçdikcə həmin kiçik addımlar böyük nəticəyə çevrilir.Təəssüf ki, biz çox vaxt ilk nəticəni görməyəndə yolun yarısından qayıdırıq. İdmana başlayırıq, bir həftə sonra dəyişiklik görməyib dayandırırıq. Xarici dil öyrənməyə çalışırıq, bir neçə dərsdən sonra çətin gəldiyi üçün imtina edirik. Halbuki uğur məhz davam edənlərin qapısını döyür.Atalar sözünün hikməti də buradadır. Damcı təkbaşına göl deyil. Amma heç bir göl də damcısız yaranmır.Bu fikir təkcə maddi qazanca aid deyil. Etibar da damcı-damcı qazanılır. Bilik də. Dostluq da. Sevgi də. İnsan bir hərəkəti ilə hörmət qazanmır, amma hər gün göstərdiyi davranışlarla cəmiyyətdə öz yerini formalaşdırır.Bəlkə də bu gün etdiyimiz kiçik bir addım bizə böyük görünmür. Amma illər sonra geriyə baxanda anlayacağıq ki, həyatımızı dəyişən məhz o kiçik addımlar olub."Damcı-damcı göl olar" sadəcə bir atalar sözü deyil. O, həyatın ən böyük qanunlarından biridir. Böyük nəticələr möcüzədən deyil, kiçik, amma davamlı zəhmətdən yaranır.Ona görə də başladığınız işi yarımçıq qoymayın. Bu gün atdığınız kiçik addım sabah quracağınız böyük həyatın təməli ola bilər.

Müəllif: Günel Fərzəliyeva