Azərbaycan - Almaniya münasibətləri daha da inkişaf edəcək - ŞƏRH

Məlum olduği kimi, ölkəmiz beynəlxalq arenada fəal xarici siyasət yürüdür. Bu siyasət ölkəmizin nüfuzunun artması ilə birlikdə son illərdə daha da möhkəmlənib. Dövlətimiz bir çox beynəlxalq əhəmiyyətli tədbirə ev sahibliyi edir, qlobal çağırışlara xüsusi diqqətlə yanaşır. Bu da öz növbəsində müxtəlif ölkələrlə strateji tərəfdaşlıq münasibətlərinin inkişafına təsir edir. Həmçinin ölkəmizin coğrafi mövqeyi, zəngin enerji resursları və qlobal nəqliyyat yollarında oynadığı mühüm rol da böyük əhəmiyyətə malikdir. Azərbaycan təkcə qonşu ölkələrlə deyil, Avropa, Asiya, Amerika və Afrika dövlətləri ilə də ikitərəfli və çoxtərəfli formatda uğurlu əlaqələr quraraq siyasi, iqtisadi və mədəni əməkdaşlığı genişləndirir.

Yeri gəlmişkən, Almaniya və Azərbaycan arasında münasibətlər strateji əməkdaşlıq və qarşılıqlı maraqlar əsasında inkişaf edir. Tarixən Avropanın iqtisadi nəhəngi və Cənubi Qafqazın enerji mərkəzi olan bu iki ölkə siyasət, enerji, ticarət və mədəniyyət sahələrində sıx əməkdaşlıq qurub. Azərbaycanın zəngin enerji ehtiyatları və mühüm nəqliyyat dəhlizlərindəki rolu, Almaniyanın isə yüksək texnologiyalar və sənaye potensialı tərəflər arasında əlaqələrin daha da möhkəmlənməsinə imkan yaradır. Son illərdə müxtəlif sahələrdə əməkdaşlığın gücləndirilməsi Azərbaycanla Almaniya arasında tərəfdaşlığın yeni mərhələyə keçdiyini göstərir. Almaniya Prezidenti Frank-Valter Ştaynmayerin 30 mart - 2 aprel tarixlərində Ermənistana və Azərbaycana səfəri Berlinin Cənubi Qafqaz siyasətinə marağının artdığını göstərir. Bu, Almaniya Federal Prezidentinin hər iki ölkəyə ilk səfəri olduğu üçün xüsusi əhəmiyyət daşıyır. Səfər Almaniya-Azərbaycan və Almaniya-Ermənistan münasibətləri ilə yanaşı, həm də regionda geosiyasi dinamikaların müzakirəsi baxımından önəmlidir.

Qeyd edək ki, aprelin 2-də Prezident İlham Əliyev və Almaniya Prezidenti Frank-Valter Ştaynmayer mətbuata bəyanatlarla çıxış edib, jurnalistlərin suallarını cavablandırıblar. Qərb ölkələri, xüsusilə də Aİ Azərbaycan və Ermənistan arasında sülh sazişinin imzalanmasını təşviq etməyə çalışırlar. Almaniya bu prosesdə Fransadan fərqli olaraq daha neytral mövqe tutmağa meyillidir. Həm də Almaniya Azərbaycanın əsas ticarət tərəfdaşlarından biridir. Səfər zamanı iki ölkə arasında iqtisadi əməkdaşlığın genişləndirilməsi və Almaniya şirkətlərinin Azərbaycandakı layihələrdə iştirak imkanlarının müzakirə edilməsi diqqətçəkən məsələlərdir. ABŞ və Aİ-nin Cənubi Qafqazda mövqelərini gücləndirməyə çalışdığı bir vaxtda Almaniya da özünü mühüm oyunçu kimi təsdiqləmək istəyir. Azərbaycan və Ermənistan arasında davam edən sülh danışıqlarında rəsmi Berlinin fəallığı onun Cənubi Qafqazda təsir dairəsini genişləndirmək məqsədini də ortaya qoyur. Almaniya Prezidentinin Cənubi Qafqaz səfəri Berlinin regiona marağının artdığını və Azərbaycanla əlaqələrini daha da gücləndirmək istədiyini göstərir. Səfər təkcə ikitərəfli münasibətlərin deyil, həm də regiondakı ümumi geosiyasi balansın bir hissəsini əhatə edir.

Onu da qeyd edək ki, Azərbaycan Avropanın enerji təhlükəsizliyində mühüm tərəfdaşdır. Almaniya rəsmi Bakı ilə enerji sahəsində əməkdaşlığın gücləndirilməsinə xüsusi maraq göstərir. Prezident Ştaynmayerin Bakıya səfəri çərçivəsində bu məsələnin gündəmdə olması gözlənilən idi. Bu görüşdə əsas diqqət nöqtələrindən biri də "yaşıl enerji" layihələri, xüsusilə Avropaya "yaşıl enerji" ixracı layihəsində Almaniyanın rolunun aktuallıq qazanması oldu. Almaniya Bakı ilə enerji, yaşıl keçid və iqtisadi əlaqələri genişləndirməyi hədəfləyir. Azərbaycanın bərpaolunan enerji sektorundakı iddialı planları və Almaniyanın bu sahədəki qabaqcıl təcrübəsi iki ölkə üçün mühüm əməkdaşlıq imkanları yaradır. Prezident İlham Əliyevin vurğuladığı kimi, Azərbaycan 2030-cu ilə qədər bərpaolunan enerji istehsal gücünü 6 giqavata çatdırmaq və bunun bir hissəsini Avropaya ixrac etmək niyyətindədir. Bu kontekstdə Almaniya şirkətlərinin Azərbaycan bazarına marağı artmaqda davam edir. Xüsusilə Almaniyanın günəş və külək enerjisi sahəsində lider ölkələrdən biri olması Azərbaycanın Qarabağ və Şərqi Zəngəzurda yeni layihələr reallaşdırılmasına imkan yarada bilər. Azərbaycan artıq Avropa ilə "yaşıl enerji" sahəsində əməkdaşlığı dərinləşdirmək üçün Qara dənizin dibi ilə keçəcək elektrik kabeli layihəsinə start verib. Almaniyanın bu və digər "yaşıl enerji" layihələrində iştirakı Azərbaycanın Avropaya strateji enerji təchizatçısı statusunu daha da gücləndirə bilər.

Almaniya Prezidenti Frank-Valter Ştaynmayerin Azərbaycana səfəri iki ölkə arasındakı münasibətlərin daha da inkişaf etməsi üçün mühüm addımlardan biri oldu. Prezident İlham Əliyevin görüş zamanı səsləndirdiyi "bu səfər bizim əlaqələrimizə yeni müsbət təkan verəcək" sözləri bu münasibətlərin perspektivlərinə işarə edir. Xüsusilə iki ölkə arasındakı ticarət dövriyyəsinin ilin ilk iki ayında üç dəfə artması Azərbaycan-Almaniya iqtisadi əlaqələrinin sürətlə gücləndiyini göstərir. İki ölkənin ticarət dövriyyəsindəki bu artım əsasən enerji sektorundakı əməkdaşlıqdan qaynaqlanır. Avropa İttifaqının enerji təhlükəsizliyini təmin etmək üçün Azərbaycana artan marağı Berlinin də rəsmi Bakı ilə əlaqələrini dərinləşdirməsinə səbəb olub. Azərbaycan Avropaya "yaşıl enerji" ixrac etməyi hədəflədiyindən Almaniya bu prosesdə əsas tərəfdaşlardan biri ola bilər. Bundan başqa, Almaniya şirkətləri Azərbaycanın bərpaolunan enerji, nəqliyyat və texnologiya sektorlarına maraq göstərirlər. Xüsusilə Azərbaycan iqtisadiyyatının şaxələndirilməsi siyasəti çərçivəsində Almaniya investorlarının ölkədəki layihələrə cəlb edilməsi perspektivi aydın görünür. Almaniya Cənubi Qafqazda aktiv rol oynamaq istəyir və bu kontekstdə Azərbaycanla münasibətlərin möhkəmlənməsi onun regional strategiyasının vacib hissəsinə çevrilir. Prezident İlham Əliyevin səfəri müsbət dəyərləndirməsi göstərir ki, Bakı-Berlin münasibətləri sadəcə iqtisadi əməkdaşlıqla məhdudlaşmır, həm də siyasi və diplomatik sahədə yeni imkanlar açır. Bakı-Berlin xəttində qurulan müsbət dialoq, eyni zamanda Azərbaycanın Avropanın digər güclü dövlətləri ilə əlaqələrinin güclənməsinə də təkan verə bilər. Xüsusilə Fransanın Ermənistanı birtərəfli dəstəklədiyi bir dövrdə Almaniyanın Azərbaycanla əməkdaşlığı inkişaf etdirməsi Qərb daxilində balanslı mövqeyin formalaşmasına kömək edə bilər. Prezident İlham Əliyevin bəyanatı onu göstərir ki, Almaniya Prezidentinin səfəri iki ölkə arasında münasibətlərin daha da inkişafına ciddi töhfə verəcək. İqtisadi sahədə əldə edilən uğurlar və ticarət dövriyyəsindəki sürətli artım bu əlaqələrin strateji əhəmiyyətini artırır. Bundan əlavə, Azərbaycan və Almaniya arasında enerji, nəqliyyat və investisiya sahələrində əməkdaşlığın genişlənməsi ikitərəfli münasibətlərin yeni mərhələyə qədəm qoyduğunu göstərir. Bu səfər Bakı və Berlin arasında həm iqtisadi, həm də siyasi münasibətlərin gələcəkdə daha da möhkəmlənəcəyinə işarə edir.

Prezident İlham Əliyevin bəyanatında mühüm məqamlardan biri də Azərbaycan və Ermənistan arasında sülhün əldə olunmasına dair müsbət dinamikanın qeyd edilməsi oldu. Dövlət başçısı vurğuladı ki, tarixi Zəfərimiz sülh danışıqlarına yol açmışdır və hazırda iki ölkənin mövqeləri kifayət qədər yaxınlaşıb. Azərbaycanın sülh prosesi ilə bağlı irəli sürdüyü təkliflər və Ermənistanla sərhədlərin müəyyənləşdirilməsi, kommunikasiyaların açılması kimi məsələlərdə atdığı addımlar rəsmi Berlinin dəstəkləyə biləcəyi konstruktiv yanaşmadır. Almaniyanın bu prosesdə neytral mövqedə yer alması Qərb daxilində Fransa kimi birtərəfli yanaşmalardan fərqli olaraq balanslı mövqe tutması Bakının diplomatik qələbələrindən biri sayıla bilər. Prezident İlham Əliyevin vurğuladığı kimi, bu, Almaniya Prezidentinin Azərbaycana ilk rəsmi səfəri idi və səfərin nəticələri iki ölkəni bir-birinə daha da yaxınlaşdıracaq. Bu səfər enerji, iqtisadi və siyasi sahələrdə əməkdaşlıq üçün yeni imkanlar açmaqla yanaşı, Azərbaycanın Avropa ilə inteqrasiyasına da töhfə verəcək. Azərbaycan və Almaniya arasında genişlənən əməkdaşlıq təkcə ikitərəfli əlaqələrlə məhdudlaşmır, həm də Azərbaycanın Qərblə münasibətlərində balanslı siyasətini gücləndirən amillərdən biri kimi çıxış edir. Bu səfər Almaniyanın Cənubi Qafqaz siyasətində Azərbaycanın önəmini bir daha təsdiqləyir və gələcəkdə daha genişmiqyaslı əməkdaşlığın əsasını qoyur. Azərbaycan və Almaniya arasında münasibətlər son illərdə sürətlə inkişaf edir. Prezident İlham Əliyevin Almaniyaya etdiyi səfərlər və yüksək səviyyəli görüşlər bu əlaqələrin mühüm sütunlarından biridir. Xüsusilə 2023-cü ildə Münxen Təhlükəsizlik Konfransında iştirak çərçivəsində Almaniya rəsmiləri və biznes dairələri ilə görüşlər, eləcə də 2024-cü ildə Frank-Valter Ştaynmayer ilə keçirilən geniş tərkibdə müzakirələr iki ölkə arasında əməkdaşlığın gələcək perspektivlərini müəyyənləşdirib. Prezident İlham Əliyevin 2023-cü ildə Almaniyanın Şərqi Biznes Assosiasiyasının baş icraçı direktoru Mixael Harms ilə görüşü iki ölkə arasında iqtisadi və ticarət əlaqələrinin önəmini bir daha təsdiqlədi. Azərbaycanın alman şirkətləri üçün əlverişli investisiya mühiti yaratması, sənaye, ticarət və digər sahələrdə əməkdaşlığın inkişafı Almaniya biznes dairələrinin ölkəmizə olan marağını artırır. Xüsusilə Almaniyanın yüksək texnologiyalı sənaye sektoru və Azərbaycanın inkişaf edən iqtisadiyyatı bir-birini tamamlayır və gələcəkdə daha geniş layihələrin həyata keçirilməsinə imkan yaradır. Azərbaycan və Almaniya arasında münasibətlər təkcə iqtisadi əməkdaşlıqla məhdudlaşmır, həm də siyasi dialoqun intensivləşməsi müşahidə edilir. 2023-cü ilin martında və 2024-cü ilin aprelində Prezident İlham Əliyev və Almaniya Prezidenti Frank-Valter Ştaynmayer arasında keçirilən görüşlər bu prosesin davamlı xarakter daşıdığını göstərir. Bu görüşlərdə iki ölkə arasında əlaqələrin daha da möhkəmləndirilməsi, regional təhlükəsizlik məsələləri və enerji sahəsində əməkdaşlıq perspektivləri müzakirə olunub. Azərbaycan Avropanın enerji təhlükəsizliyinin təmin olunmasında mühüm rol oynayır və Almaniya bu prosesdə vacib tərəfdaşlardan biridir. Azərbaycan və Almaniya arasındakı münasibətlər sabit şəkildə inkişaf edir və müxtəlif sahələrdə yeni əməkdaşlıq imkanları yaradır. İqtisadi, siyasi və enerji sahələrində davam edən əməkdaşlıq iki ölkənin strateji tərəfdaşlığa doğru irəlilədiyini göstərir. Gələcək illərdə bu əlaqələrin daha da genişlənəcəyi və Azərbaycanın Almaniya ilə əməkdaşlığının daha da dərinləşəcəyi gözlənilir.

Ən əsası, Almaniya Prezidenti Frank-Valter Ştaynmayerin Azərbaycana rəsmi səfəri, Prezident İlham Əliyevin mətbuata bəyanatında səsləndirdiyi fikirlər göstərir ki, Azərbaycan və Almaniya əməkdaşlığın yeni istiqamətlərini müəyyən edərək daha dərin iqtisadi və siyasi tərəfdaşlığa doğru irəliləyir.

İlkin Rzayev,

YAP Göygöl rayon təşkilatı üzrə Toğanalı kənd ərazi partiya təşkilatının sədr müavini