Həmrəylik millətin yaddaşı, liderin mirası və dövlətin gələcəyidir - ŞƏRH

Dünya Azərbaycanlılarının Həmrəyliyi Günü ideyasının müasir mənada formalaşması, onun siyasi doktrinaya və milli ideologiyaya çevrilməsi bilavasitə Ümummilli Liderin uzaqgörən dövlətçilik düşüncəsi ilə bağlıdır. 31 Dekabr -sadəcə bir bayram deyil. Bu tarix dünya azərbaycanlılarının milli özünüdərk, tarixi yaddaş və ümumxalq birliyi anlayışlarını vahid ideya ətrafında birləşdirən simvolik gündür. Lakin bu ideyanın davamlı, məqsədli və strateji məzmun qazanması üçün onu daşıyan dövlət iradəsi və lider baxışı zəruri idi.Heydər Əliyev həmrəylik ideyasını emosional çağırış səviyyəsindən çıxararaq onu dövlət siyasətinin prioritet istiqamətinə çevirdi. Onun baxışında dünya azərbaycanlıları sadəcə diaspor deyil, vahid milli orqanizmin müxtəlif coğrafiyalarda döyünən ürəkləri idi.Ümummilli Liderin siyasi fəlsəfəsində azərbaycançılıq ideologiyası mərkəzi yer tuturdu. Bu ideologiya milli kimliyi, dili, dini, mədəniyyəti və tarixi vahid dəyər sistemində birləşdirirdi. Məhz bu kontekstdə dünya azərbaycanlılarının həmrəyliyi azərbaycançılığın qlobal təzahürü kimi dəyərləndirilirdi. Heydər Əliyevin təşəbbüsü və siyasi iradəsi nəticəsində dünya azərbaycanlıları ilə sistemli əlaqələrin əsası qoyuldu, diaspor fəaliyyəti pərakəndə təşəbbüsdən koordinasiyalı mexanizmə çevrildi və milli maraqların beynəlxalq müstəvidə müdafiəsi institusional xarakter aldı.Bu proseslərin kulminasiya nöqtəsi Dünya Azərbaycanlılarının I Qurultayı oldu. Qurultay həm milli həmrəyliyin rəmzi, həm də onun praktik yol xəritəsi idi. Heydər Əliyevin ən böyük tarixi nailiyyətlərindən biri həmrəyliyi yalnız milli-mənəvi kateqoriya kimi deyil, dövlətçilik aləti kimi təqdim etməsi idi. O, aydın şəkildə göstərirdi ki, güclü dövlət yalnız daxildə deyil, dünya miqyasında da milli dayaqlara söykənməlidir.Bu baxımdan Dünya Azərbaycanlılarının Həmrəyliyi Günü milli maraqların qlobal səviyyədə müdafiəsinin rəmzi, Azərbaycanın beynəlxalq nüfuzunun möhkəmlənməsinin mənəvi dayağı, xalq–dövlət–diaspor birliyinin ideoloji platformasıdır.

Dünya Azərbaycanlılarının Həmrəyliyi Günü ilə Heydər Əliyev irsi arasında qırılmaz ideoloji bağ mövcuddur. Bu bağ milli birliyi təsadüfi emosiyadan çıxarıb davamlı dövlət siyasətinə çevirən strateji düşüncənin təzahürüdür. Azərbaycan dövləti güclüdürsə, bu gücün təməlində təkcə iqtisadi və hərbi potensial deyil, Heydər Əliyevin formalaşdırdığı milli həmrəylik fəlsəfəsi dayanır. Çünki həmrəylik - millətin yaddaşı, liderin mirası və dövlətin gələcəyidir.

Bu gün Prezident İlham Əliyevin rəhbərliyi ilə Azərbaycan həmrəylik ideyasını post-müharibə dövrünün milli konsepsiyasına çevirmişdir. Xüsusilə Vətən müharibəsindən sonra dünya azərbaycanlılarının bir yumruq kimi birləşməsi sübut etdi ki, həmrəylik artıq simvol deyil, real siyasi və mənəvi gücdür.

Bu dövrdə həmrəylik milli qürurun beynəlxalq tanınmaya çevrilməsi,tarixi ədalətin informasiya müstəvisində müdafiəsi, Zəfər ideologiyasının qlobal miqyasda möhkəmləndirilməsi deməkdir.İlham Əliyevin “Biz güclü dövlət qurmuşuq” fikri yalnız daxili auditoriyaya deyil, dünya azərbaycanlılarına ünvanlanan ideoloji çağırışdır. Müasir Azərbaycan ideyası artıq məğlubiyyət psixologiyası üzərində deyil, qalib dövlət fəlsəfəsi üzərində qurulub. Bu fəlsəfədə dünya azərbaycanlılarının rolu daha da aktuallaşır. Çünki qalib dövlətin diasporu da özünə inamlı, prinsipial və təşkilatlanmış olmalıdır.

Samirə Zeynalova

YAP Tərtər rayon təşkilatının mühasibi