Bərpa olunmuş rayonlarımızda bu gün artıq 70 min insan yaşayır

Azərbaycanın işğaldan azad edilmiş ərazilərində həyata keçirilən genişmiqyaslı bərpa və yenidənqurma işləri artıq real nəticələr verməkdədir. Dövlətin ardıcıl və məqsədyönlü siyasəti nəticəsində bu gün bərpa olunmuş rayonlarımızda 70 minə yaxın insan yaşayır. Bu göstərici Böyük Qayıdış proqramının uğurla icra edildiyini təsdiqləyir.
Azad edilmiş ərazilərdə müasir yaşayış kompleksləri, fərdi evlər, məktəblər, uşaq bağçaları, tibb müəssisələri və sosial infrastruktur obyektləri inşa olunur. Paralel olaraq yol, su, elektrik və qaz təchizatı kimi əsas kommunal xidmətlər bərpa edilir. “Ağıllı kənd” və “ağıllı şəhər” konsepsiyalarının tətbiqi bölgədə dayanıqlı və müasir yaşayış mühitinin formalaşmasına şərait yaradır. Əhalinin bu ərazilərə könüllü və təhlükəsiz şəkildə köçürülməsi həm sosial rifahın yüksəldilməsinə, həm də regionun iqtisadi potensialının canlandırılmasına xidmət edir. 70 minlik yaşayış göstəricisi gələcək illərdə bu rəqəmin daha da artacağını və Qarabağla Şərqi Zəngəzurun ölkənin inkişafında mühüm rol oynayacağını göstərir.
İkinci Qarabağ müharibəsində əldə olunan tarixi Qələbədən sonra Azərbaycan regionda yeni nəqliyyat və logistika reallıqlarının formalaşdırılmasına dərhal start vermişdir. Müharibədən cəmi bir neçə ay sonra mühüm nəqliyyat dəhlizlərinin icrasına başlanılması ölkənin strateji baxışının və siyasi iradəsinin göstəricisidir.
Bu dəhlizlərin yaradılması regionda iqtisadi inteqrasiyanın dərinləşdirilməsinə, ölkələrarası əlaqələrin möhkəmlənməsinə və ticarət dövriyyəsinin artmasına xidmət edir. Azərbaycan yalnız öz milli maraqlarını deyil, eyni zamanda regional sabitliyi və əməkdaşlığı da prioritet kimi götürərək bu layihələri həyata keçirmişdir.
Dəhlizin icrasına erkən mərhələdə başlanılması Azərbaycanın geosiyasi mövqeyini daha da gücləndirmiş, ölkəni beynəlxalq nəqliyyat xəritəsində mühüm mərkəzə çevirmişdir. Bu təşəbbüs postmünaqişə dövründə sülhə, əməkdaşlığa və davamlı inkişafa yönəlmiş strateji addım kimi qiymətləndirilir.
Naxçıvan Muxtar Respublikası üzərindən keçən yeni nəqliyyat yolu Azərbaycanın beynəlxalq tranzit imkanlarını əhəmiyyətli dərəcədə genişləndirir. Bu yol iki əsas istiqamətdə inkişaf edərək, bir tərəfdən Türkiyə və Avropaya, digər tərəfdən isə İran, Fars körfəzi və Yaxın Şərq ölkələrinə çıxışı təmin edir.
Türkiyə–Avropa istiqaməti Azərbaycanı Qərb bazarlarına daha sürətli və etibarlı şəkildə bağlayır, Avropa ilə iqtisadi və ticarət əlaqələrinin güclənməsinə şərait yaradır. Digər istiqamət isə İran üzərindən Yaxın Şərq və Fars körfəzi ölkələrinə çıxışı təmin etməklə Azərbaycanın Cənub marşrutu üzrə strateji əhəmiyyətini artırır.
Bu yolun fəaliyyəti nəticəsində Naxçıvan regional logistika mərkəzinə çevrilir, tranzit gəlirləri artır və regionun iqtisadi aktivliyi yüksəlir. Eyni zamanda, layihə ölkələr arasında qarşılıqlı etimadın möhkəmlənməsinə və uzunmüddətli əməkdaşlığın inkişafına xidmət edir.

Şakir Məmmədov
YAP Laçın rayon təşkilatı, 50 saylı ƏPT-nın fəalı
Laçın rayonu Bayram Məmmədov adına Minkənd kənd tam orta ümumtəhsil məktəbin riyaziyyat - informatika müəllimi