Azərbaycan qadını: müasir dövlətçiliyin zərif gücü - ŞƏRH

Azərbaycan qadınının ictimai-siyasi arenadakı yolu sadəcə hüquqi islahatlarla deyil, həm də dərin mənəvi-mədəni köklərlə bağlıdır. Bu tarixi yolun ən parlaq səhifəsi 1918-ci ildə Azərbaycan Xalq Cümhuriyyətinin qurulması ilə açılmışdır. Həmin dövrdə bir çox inkişaf etmiş Avropa ölkəsində qadınlar hələ səsvermə hüququ uğrunda mübarizə apardıqları halda, Şərqdə ilk dəfə məhz Azərbaycanda qadınlara seçib-seçilmək hüququnun verilməsi xalqımızın mütərəqqi təfəkkürünün ən bariz sübutu idi. Bu tarixi qərar qadınların cəmiyyətin taleyində söz sahibi olmasının təməlini qoymaqla yanaşı, prosesin məntiqi davamı kimi keçirilən Azərbaycan qadınlarının ilk qurultayı ilə qadın hərəkatını milli ideologiyanın tərkib hissəsinə çevirdi.

​Tarixdən gələn bu azadlıq və fəallıq ruhu müasir müstəqil Azərbaycan dövlətinin qurulması ilə yeni, daha keyfiyyətli bir mərhələyə qədəm qoydu. Artıq qadın hüquqlarının qorunması sadəcə ictimai təşəbbüs deyil, dövlət siyasətinin ayrılmaz və prioritet tərkib hissəsi kimi formalaşdı. Bu siyasətin effektivliyini təmin edən ən mühüm amil Ulu Öndər Heydər Əliyevin uzaqgörən addımları, xüsusilə 6 mart 2000-ci il tarixində imzaladığı “Azərbaycan Respublikasında dövlət qadın siyasətinin həyata keçirilməsi haqqında” Fərman oldu. Bu tarixi sənəd dövlət qurumlarında qadınların rəhbərlik səviyyəsində kişilərlə bərabər təmsil olunmasını strateji vəzifə olaraq qarşıya qoydu və ölkəmizdə gender bərabərliyinin əsas təminatçısına çevrildi.

​Ulu Öndərin müəyyənləşdirdiyi bu strateji kurs bu gün Prezident İlham Əliyev tərəfindən yüksək dinamika ilə davam etdirilir. Dövlət başçısı qadınların cəmiyyətdəki rolunu hər zaman uca tutaraq qeyd edir ki, “Azərbaycan qadını öz zəkası, uzaqgörənliyi, fədakarlığı, yüksək mənəviyyatı ilə hər zaman cəmiyyətimizin aparıcı qüvvəsi olmuşdur.” Prezidentin rəhbərliyi altında qadınların hüquqlarının qorunması təkcə fərmanlarla deyil, həm də Ailə, Mülki, Cinayət və İnzibati Xətalar məcəllələrini əhatə edən geniş qanunvericilik bazası ilə möhkəmləndirilib. Xüsusilə 2010-cu ildə qəbul edilmiş “Məişət zorakılığının qarşısının alınması haqqında” Qanun və beynəlxalq konvensiyalara qoşulmağımız milli qanunvericiliyi dünya standartları səviyyəsinə yüksəldərək qadınların həm əmək bazarında, həm də hüquqi müstəvidə diskriminasiyadan uzaq yaşamasını təmin etmişdir.

​Bu hüquqi təminatın yaratdığı imkanlar nəticəsində Azərbaycan qadını bu gün təkcə ailə ocağının qoruyucusu deyil, həm də beynəlxalq arenada ölkəmizi layiqincə təmsil edən güclü bir simadır. Bu istiqamətdə Birinci vitse-prezident Mehriban xanım Əliyevanın çoxşaxəli fəaliyyəti, onun humanizm və xeyirxahlıq prinsiplərinə əsaslanan qlobal nüfuzu müasir Azərbaycan qadını üçün əsl örnək və ilham mənbəyidir. Cənab Prezidentin vurğuladığı kimi, “Müasir Azərbaycan dövlətinin uğurlarında qadınlarımızın müstəsna payı var” və bu pay qadınların dövlət idarəçiliyindən tutmuş ən müasir texnoloji sahələrə qədər hər yerdə özünü büruzə verir. Qadınların sahibkarlıq təşəbbüskarlığı, elmi-tədqiqat fəaliyyəti və innovasiya layihələrindəki aktiv iştirakı ölkənin iqtisadi dinamizmini gücləndirən əsas faktorlardan biridir.

​Bütün bu islahatların vizual və ictimai təzahürü olan “Güclü Cəmiyyətin Zərif Simaları” layihəsi bir daha təsdiq edir ki, Azərbaycanın gələcəyi intellektual və güclü iradəyə malik qadınların fəaliyyəti ilə sıx bağlıdır. Beləliklə, 8 Mart ölkəmizdə sadəcə bir bayram günü deyil, həm də Azərbaycan qadınının dövlətimizin yüksəlişindəki əvəzsiz rolunun, milli-mənəvi dəyərlərin qorunmasındakı xidmətlərinin və qazanılmış böyük hüquqi zəfərlərin təntənəsidir. Prezident İlham Əliyevin də qeyd etdiyi kimi, Azərbaycan qadını öz varlığı ilə cəmiyyətimizə zəriflik, mənəvi saflıq və güclü dövlətçilik ruhu aşılayır.

Tutu Kamalqızı
YAP Zəngilan rayon təşkilatının sədr müavini